Hesekê ke pê şîarê 'Her govende hîkayeyêk a û her hîkaye tarîxêk o' Festîvala Govende ya Şehîde Ronahî Bawer a 5. yena kerdene. Temamîya Rojawanî ra 16 komê govende tewrê festîvale bîyî.

Endamanê Komanê Govende verê Merkezê Kultur û Hunerî yê Xabûrî de verî bi şîarê 'Rayraşîyayîşê rûmetî vera îxanetî' rayraşîyayîşêk kerd. Dima Merkezê Kultur û Hunerî yê Serdemî de festîvale dest pêkerde.

Dadîya Şehîde Ronahî Bawer Emîne Hisên qisey kerd û ard ziwan ke a pê şehadetê kênaya xo sereberz a. Hemsereka TEV-ÇANDî Nisrîne Botan zî pare kerd ke şarê Rojawanî vera hêrişan kulturê xo pawenê û ê do pê govendan welatê xo bipawê. 

Endama Komîteya Amadekare Dîma Elî zî îfade kerd ke ê armanc kenê ke pê na festîvale nêrazîbîyayîşê xo vera îşxalê dewleta tirke yê serê Rojawanî bimojnê.