Enûde Farîs Hesena 60 serrî ya ke her çiqas komel seba cinîyan bira tay rolan daye zî xeyalê xo ardî ca beşdara 10 peramotişan bîye. Enûde nika xeyalan û fikranê xo bi xêzkerdişê resiman îfade kena û 'cinîye' xêz kena.
Enûda ke dewa Boncogî ya Qamişloyî de ciwîyena xeyalê xo ardî ca û bîye resam û nika pêro xeyal û fikranê xo pê resiman mojnena. Enûde Faris Hesen dadîya 7 domanan a û bi hetkarîya lajê xo yo ke Fakulteyê Hunerî de wand hunerê xo yê resimî aver bena.
Enûde domanîya xo ra nata resiman xêz kena la seba ke çimê komelî de cinîyêk nêeşkena resim xêz bika nêeşkîyaye ke hunerê xo yê resimî aver bera. La wexto ke lajê ci perwerdeyê xo yê hunerî qedîna paştî da dadîya xo. Enûde serra 2011î de seba ke xo aver bera dest pêkena.
Enûde wexto ke xêzkerdişê lajê xo seyr kerdêne weçînayîşê rengan û detayê hunerê resimî musaye. Enûde eseranê xo de exlebî ca dana cinîya kurde, xoza, xoverdayîşê Rokawanî û komel. Enûde vana: "Ez kena ke fikranê xo pê resimî îfade bika. Coka ge ge ez bi rojan bîleyê tabloyekî bena. Ez kena ke ez dejê cinîyan, binpaykerdişê heqanê înan, tedaya serê înan û têkoşînê cinîyan ê vera nê astengan bimojna.'' Enûde heta nika Qamişlo de beşdara 10 peramotişan bîye û Peramotişê Hunerê Resiman ê 3. ê Qamişloyî de hetê Komîteya Kultur û Hunerî yê Herêma Cizîrî ra ameye xelatdayene.
Resame Enûde qala xo wina qedînaye: "Eke merdim biwazo armancê xo bîyaro ca, çew nêeşkeno verê ci de vindero. Coka ez venga cinîyan dana ke asteng çi beno wa bibo xîret bikê ke huner, waştişê xo dima bibê."
