Îşxalê dewleta tirke yê vera Efrînî ra di serrî vîyartî. Dewleta tirke û cerganê ci kerd ke bi hezaran kesî koç bikê. Her çiqas çend wext vîyart zî trajedîya koçberan hema zî dewam kena. Şarê Efrînî pabeyê ê rojan ê ke abigêrê keyeyanê xo.

Rewşene Sîno ya ke 14 serrî ya her çiqas cuya koçberîye zaf zehmetîye dana ci zî kena ke hunerê xo yê resimî aver bera. Rewşene dewa Husê ya Mabata ra ya û 8 serran ra nata resiman virazena. Rewşene Efrîn de zî derheqê domanan û xozayî de zaf tabloyî viraştî. Îşxalê dewleta tirke ya vera Efrînî ra dima xeyalê Rewşene sey dêsanê ke ser o ci resimî xêzkerdene perçe parçe bîyî.

îşxalê Efrînî ra dima Rewşene keyeyê xo reyde koçê dewa Til Qirahî ya Ehdasî ya Efrînî kerd. Rewşene Têgêrayîşê Huner û Kulturî û Yewîya Roşnvîran reyde beşdara viraştişê tabloyê tewr dergî de cagirewt. Rewşene Şehba de 20 tabloyî xêz kerdî û beşdara 3 peramotişan bîye. Rewşene tabloyanê xo de qala barbarîya dewleta tirke ya Efrînî û koçî kena. Rîyê firsendanê kêman ra Rewşene nêeşkena tim tuwal se ro bixebita. A zî hêvîyanê xo dêsanê rijîyayenan ser o xêz kena. Dêsî zî bi nê hawayî qala zehmetîyanê koçberîye kenê.

Rewşene vana: "Mi tabloyêkê xo de qala serebûtêkê koçberîye kerde. Ma seba ke koç bikerê kewtibî rayîr. Koyê Elhamî de mêrikêko kal o 80 serre hînî nêeşkîya rayîr ra şoro û uca de wefat kerd."