Hewteyê Kulturî yo 8’in o ke hetê Merkezê Kulturî yê Medî ra amebi amadekerdene, roja 4’ê Nîsane merkezê bajarî de dest pêkerdibi. 4 rojan de xeylî rojnamegerî, akademîsyenî, hunermendî, temsîlkarê partîyanê sîyasîyan û rêxistinê cimatan ê sîvîlan ê Swîsî, Tirkîya û Kurdistanî tewrê çalakîye bîyî.

Mabênê 4 rojan de xeylî çalakîyê kulturî û hunerî ameyî viraştene. Vizêrî zî konserêk ame viraştene û hunermenda Fransanije Eleonore Fourniau, Mîkaîl Aslan û Xecê vejîyayî sahne.

Vizêrî salona sînema ya Kult Kînoyî de fîlmê ‘Bajarêko Rijiyaye’ yê serê xoverdayîşê Rojawanî ame mojnayene.

Salona Sendîkaya Unîa de zî derheqê tarîxê edebîyatî, ziwan û dengbêjîye de panelêk ame viraştene. Cevat Merwanî, Zînê Botanî, Memê Botanî, Yilmaz Beyazgul, Gernas Koçer, Yaqop Tilermenî beşdarê panelî bîyî û qalê kultur û tarîxê kurdan kerd. Dengbêjan zî deyîrê xo vatî.

Dimayê panelî numayîşê folklorî ame pêşkêşkerdene û Hewteyê Kulturî yo ke 4 rojî dewam kerdêne bi deyîranê Koma Lelo qedîya.