Emsar Gurcistanî meymandarîya nê fuarî kerde û 110 welatan ra nizdê 7 hezar û 500 weşanxaneyî tewrê ci benê.

Fuar de xeylî aktîvîteyê ke derheqê heqanê merdiman de bîyî ameyî viraştene. Fuar de „kitabê qedexeyî“ yê Tirkîye emsar zî hetê açarnayox-nûştox Ragip Zarakoluyî ra ameyî pêşkêşkerdene.   

Akin Bîrdalo ke sey Serekê Anorkî yê Komela Heqanê Merdiman (IHD) tewrê fuarî bi, bi kitabê xo yê rêza tarîxê nizdî yo ewilên Zerfo Zerd wendoxanê xo dir ame têhet. Kitab de serrê domanî û ciwanîya ci, cuya ê ya meslege, kewtişê mucadeleyê sîyasî û sosyalî mîyan, daxilê organîzasyonanê meslegan û Komela Heqanê Merdiman ke sereyê ci ra tede bi û hêrişo bisîleh ke 12ê Gulane 1998 de hemverê ci de ame kerdene zî ca gênê.     

XULASAYÊKA MUCADELEYÊ AZADÎYE YA NÎM SESERRE

Birdal kitab de ca dano vîrardişanê xo yê bi Azîz Nesîn, Vedat Turkalî, Can Yucel, Hirant Dînk û Mîhrî Bellîyî û qalê hemrahîya embazanê mucadeleyî keno.  

Bîrdalî Zerfo Zerd sey adresêk name kerd û vat „No adres xo de edalet, azadî û umîdî kirişneno. Hîkayeyêka cuye ya nizdê 50 serrî, na hîkayeya ma pêroyan a. Hîkayeya hesreta heqanê merdiman, aşitî, demokrasî û edaletî ya û hîkayeya rayraşîyayîşêk a.“   

Bîrdalî peynî de ard ziwan ke kitab rojanê ma yê ameyokan de Tirkîye de do biroşîyo û tewrê Fuarê Kitaban yê TUYAPî yê Stenbolî bibo.