Hunermendê kurdî seba ke paştî bidê caardişê yewîya neteweyîye paytextê Swêdî Stockholm de konserêk do bidê.

Çar parçeyanê Kurdîstanî ra hunermendî do beşdarê konserê bi şîara ''yewîya neteweyîye'' bibê. Şivan Perwer, Mîhamed Taha Akreyi, Nasir Rezzazi, Narin Feqe, Xelil Xemgin, Nejmeddin Xulami, Hesen Şerif, Ayfer Duzdaş, Diyar Dersimî, Kejal Ademi, Hoshyar Hama Farag û Marîwan Safadin zî do konser de sehne bigêrê. Hunermend Armancî derheqê konserî de ANFyî reyde qisey kerd û îfade kerd ke menganê vîyarteyan de hunermendê kurdî seba ke paştî bidê caardişê yewîya neteweyîye ameyî pêser û înan bire daye ke seba nê armancî tay aktîvîteyî bikerê.

Hunermend Armancî da zanayene ke bi nê esasî tewr peyêne Hewlêr de konserêk ame kerdene. Armancî ard ziwan ke hunermendê kurdî beno ke yewbînan ra cîya zî bifikîrê caardişê yewîya neteweyîye nînan ano pêser. Armancî vat: ''Senî dewletê asîmîlekerî vera Kurdîstanî benê yew kurdî zî bi nê hawayî ganî bêrê têhet.'' Armancî venga pêro kurdîstanijan û dostanê înan da ke paştî bidê xîretanê hunermendan ê seba yewîya neteweyîye û tewrê konserî bibê.  Konser do Solna Hallenê Stockholmî  de 23ê sibate dişemeyî de saete 14:00 de dest pêbikero.