Hunermendanê Înîsîyatîfê Hunerê Azadî şaristanê Kolnî yê Almanya de weçînayîşanê Başûrê Kurdîstanî ser o eşkerayîyêke daye.

Hunermendan ra Nebez Ebdila, Sheyda Ghavamî û Hozan Diyarî qisey kerd.

Nebez Ebdila: PDK dest nano heqê weçînayîşî ser. 20ê teşrîna verêne tarîxêko newe yo. Ganî şarê ma şoro sindoqan ser. Şorê raya xo bidê û peynîya şaşîye bîyarê. Xo rê vanê Partîya Demokrate ya Kurdîstane. La wina bina nêeşkena rojnamegeran şehîd bikera. Destûr  nêdê ke Başûr ancî bikewo binê îqtîdarê keyeyêkî.

Sheyda Ghavamî: Ez sey cinîyêka kurde venga cinîyan dana ke hêzê xo ra bawer bikerê. Ez cinîyan ra wazena ke nê weçînayîşan de raya xo bidê namzedanê welatperweran. Partîya ke do biba îqtîdar ganî têkilîyanê xo yê bi Îran û Tirkîya newe ra dîzayn bikera. Wa hinî rayîr nêro dayene dişmenî.

Diyar: Başûr de qereqelê dewleta tirke Vakurî ra zafêr ê. Ganî şarê ma weçînayîşan de bi raya xo vajê ke ê îşxalî qebul nêkenê. Ganî şarê ma cewabê hêrişanê îşxalî û xeta îxanetî bidê. Şarê ma yê Başûrî wayîrê hîsanê welatperwerîye yê. Şarê Başûrî xizan o la tayê sîyasetmedarê Başûrî zengîn ê. Wa verê ney bigêrîyo. Wa her kes şoro sindoqan ser û raya xo bido. Ma pabeyê mijdanîya şima yê.