Qamişlo de şar, hunemermend û endamê dezgehanê komelê sîvîlî  seba ke serrgêra şehadetê  ci de hunermedo kurd Mihemed Şêxoyî yad bikerê mezalanê Hilêlîyê de ameyî têhet.

Hunermend Sefqan Orkêşî vat Mihemed Şêxo bi kede, vengî û deyîranê xo semdê şarê kurdî dinya de hunermendêko bêhempa yo.

Eendamê Komîteya Hunerî ya Meclîsê Şarê Qamişloyî Cemil Meşkînî zî ard ziwan ke kulturo ke Mihemed Şêxoyî semedê şarê kurdî ard pê ewro ciwanan paweno û vat: ''Bi vindertiş û ehleqê xo hêz da kulturê kurdan. Ma ewro nameyê ey danê dezgehanê xo û qicê ma deyîranê ey vanê.''

Badê qiseykerdişan mezelê Mihemed Şêxoyî ser vilîkî ameyî ronayene û deyîrî ameyî vatene.

Hunemend Mihemed Şêxoyî 9ê Adara 1989î de netîceya krîzê zerrî de dinyaya xo bedilnaye.