Hunermenda tîyatroyî îdarekare Berfîne Zenderlîoglu bi kargehê tîyatroyê kurdkî wazena bi ziwanê dayîke tîyatro bimusna û seba ameyoxî kadroyêkê tîyatroyê kurdkî awan bikera.

Dersê tîyatroyî 16ê sibate de Kay-Der de qezaya Kadikoyî ya Îstanbulî de dest pêkerd.Heta nika 30 kesan seba dersanê tîyatroyê kurdkî muracat kerd. Zenderlîoglu serra 2004î ra nata tîyatroger a û ronayoxanê Performansê Şermola ra yew a. Zenderlîoglu nika îdarekarîya tîyatroyî kena û bi kurdkî kayan nusena.

Derheqê destpêkerdişê karî de Zenderlîoglu vat: ''Wextêkî dergî ra nata mi waşt ke ez kakerdoxîye bikera. Ma waşt giranîye bidê şaristananê Amedî, Wanî, Bedlîs û Mêrdînî û tîya de bixebitê. Ma merdiman reyde qisey kerd la belê fon girîng bi. Mi waşt ez paştî bida tîyatroyê kurdkî. Ma wazenê teberê Îstanbulî de zî kargehan awan bikerê.''

Berfîne derheqê kargehî de nê zanayîşî dayî: ''Kargeh çar mengan dewam bikero û her yewşeme do bibo. Ziwanê kargehî kurdkî yo. 30 kesan muracatê kargehî kerd. Ma 16ê sibate de dest pêkerd. Ciwanê ke bi tîyatroyê kurdkî eleqedar ê zaf ê.''

Berfîne seba armancê xo vat: ''Ez wazena tîyatroyê kurdkî xurtêr bikera û kêm zî biba bida mojnayene. Hetê bînî ra zaf ercaye yo ke bi ziwanê dayîka xo ez tîyatrıo musnena ciwanan. Na babete de zaf kêmasîye esta. Eke ma na kêmasîye safî nêkerê kam do bikero? Na çarçewe de ma dest pê karî kerd.''

Berfîne vat: ''Îdarekarê herême hem qala ziwanê dayîke kenê hem zî hetê bînî ra seba ziwanê dayîke karêkê cîdîyî nêkenê. Eke kulturê tîyatroyî nêvurîya kulturê kurdan tede rolê her kesî esto. Ma mîyanê bêîmkanîye de îmkanan virazenê. Ganî seba naye paştî bêro dayene.''