Festîvala Fîlman a Cenevre ya Mîyan-neteweyî ke her serre bi hawayêkê tradîsyonkî yeno viraştene 24inê ci 2yê Teşrîna peyêne de dest pêkeno. Festîvala ke tede xeylî fîlmî do reya ewilêne bêrê ramotene, babetê înan yewbînan ra cîya 150 ra vêşêr fîlmî do biresê temaşekaranê xo. Festîvale do heta 10ê Teşrîna verêne dewam bikero, wextê festîvale de xeylî dîrektorê fîlman û kaybazî zî temaşekaran dir bêrê têhet.

Mîyanê fîlmanê ke do emser tewrê festîvale bibê de oyo ke tewr zaf bale anceno fîlmê dîrektora firansize Eva Husson ê bi nameyê Filles du Soleil (Keynayê Rojî) o ke babeta ci mucadeleyê cinîyan ê kurdan ê hemverê DAÎŞî yo ke Şengal û Rojava de danê.

Keynayê Rojî yo ke reya ewilêne Festîvala Fîlman a Cannesî yê 71. de ame ramotene her çend xelatêk nêgirewte zî ê ser o zaf ame qiseykerdene.

 ‘MI WAŞT KE EZ XOVERDAYÎŞÊ CINÎYANÊ KURDAN RAMOJNÎ DINYA’

Eva Hussona ke kombîyayîşêkê prosesê Festîvala Fîlman a Cannesî de qisey kerdibi derheqê fîlmî de nê vatîbî: „Hetê DAÎŞî ra remnayîşê cinîyanê kurdan, rixmê dramê ke ciwîyayî de teslîm nêbîyayîşê înan, xoverdayîşê înan û mucadeleyê înan ê pîlî mi ser o zaf tesîr kerd. Înan xo dayo rayîrê serkewtişî, na yewe ra qezenc kenê. Xora seva nê her kes mutesîr beno. Ez zî nê ra mutesîr bîya. Bi viraştişê nê fîlmî mi waşt ke nê hêzî, cehdî û xoverdayîşî ramojnî dinya.“