Weşanxaneyê Vateyî yo ke 25 serran ra nata warê ziwan û edebîyatê kirmanckî de eserê girîngî pêşkêşê wendoxan kerdî, bi nameyê ''Dewrêsî'' kitabo newe yê Alî Aydin Çîçekî çap kerd.

Nuştox Alî Aydin Çîçekî kitabê xo yê neweyî Dewrêsî de estanikê Erzînganî arê dayî. Kitab Roja Ziwanê Dayîke ya Mîyanneteweyîye de (ewro) vejîya.

Alî Aydin Çîçek Kam o?

Alî Aydin Çîçek, serra 1984 de Gimgim de ameyo dinya. Hetanî lîse Gimgim de wendo. Unîversîteyê Duzce de qeydê xo viraşta labelê seba ke wezîfeyê xo yê eskerîye nêardo ca heqê wendişî dest ra ameyo girewtene. Serra 2009 de ÎHD yê îstanbulî de duştê mîlîtarîzm û mucburîya leşkerîye de Redê xo yê Wijdanî eşkera kerd. Gama ke dezgeyê UNESCOyî derheqê rewşa vindîbîyayîşê lehçeya zazakî (kirmackî/dimilkî) de rapor vila keno, o zî keweno binê tesîrê nê raporî, Enstîtuya Kurdî ya Îstanbulî û Weşanxaneyê Vateyî de verî derse gêno, dima o bi xo dersa ziwanî dano.

Hîkaya ey a bi sernameyê “Xêx”î 2009 de musabeqaya hîkaye û şîîran a des û hewtine ya Huseyîn Çelebî de xelata dîyine gêno. Dima, musabeqaya fiqrayan ke keyepelê Zazakî.Netî organîze kerde, fiqraya ey a bi sernameyê “Şima Teskere Nêdanê, Dewlete Dana” xelata yewine gêna. Reyna, 2010 de, musabeqaya hîkayan a Abdullah Duranî de hîkaya ey “Mar” xelata mansîyonî gêna. Û musabeqaya hîkaye û şîîran a des û heştine ya Huseyîn Çelebî de zî şîîra ey “Xatir” xelata yewine gêna. Alî Aydin Çîçek nika Ewropa de ciwîyeno. (Bîyografî Zazakî.Netî ra ameye girewtene)

Eserê ey ê bînî:

1.Teberik, Weşanxaneyê Vateyî, Îstanbul, 2010

2.Sayê Marû, Weşanxaneyê Vateyî, Îstanbul, 2012

3. Kartê Ziwanî yê Kirmanckî, Weşanxaneyê Vateyî, Îstanbul, 2016

4.Antolojîyê Şîîranê Kirmanckî, Weşanxaneyê Vateyî, Îstanbul 2018