Komelê Cinîyan ê Azadan ê Rojhelatê Kurdîstanî (KJAR) derheqê şerê mabênê Îran û Îsraîlî de eşkerayîyêke daye. Eşkerayîya KJARî wina ya:

‘’Şerê dewletanê neteweyîyan seba azadîya komelan rayîrêk nîyê. Rayîrê azadîye û felate têkoşînê demokratîkî yê cinîyan ra derbaz beno. Şero ke mabênê Îsraîl û Îranî de yo, netîce û planê hêzanê kapîtalîstan o. Yew eleqeyê nê şerî bi azadkerdişê cinî û domanan çin o. 

Hetê bînî ra nêbeno ke sloganê ‘Jin, Jiyan, Azadî’ seba armancanê sîyasîyan bêro şuxilnayene. No slogan yew propagandaya sîyasîye ney berhemê têkoşînê azadîye yê cinîyan o.

Komara Îslamî ya Îranî bi polîtîkayanê sey îdam, cînayetanê cinîyan, xizanîye û bêkarîye mîyanê komelî de bi taybetî vera cinîyan şer keno. Şerê vera Îsraîlî do tena krîzan xorinêr bikero. Şerê mabênê dewletan do qetî demokrasî nêarê. 

Têkoşînê ke cinîyî serkêşîya nînan kenê do azadîye bîyarê. Heta ke sîstemo kapîtalîst est bo şerî do dewam bikerê, cinîyan rê xirabbîyayîş bêro ferzkerdene. Cinîyan vera nê polîtîkayan şer kerd. Şorişê ‘Jin, Jiyan, Azadî’ bi xo nimûneya têkoşîn û serkêşîya cinîyan a.

Ma sey KJARî seba azadîye girîngîye danê rêxistinîya cinîyan û komelî û seba ney veng danê. Ma venga pêro şaran û beşanê komelî danê ke Îran de warê sîyasîyî de seba yewî û paştdayîşî komîte û dezgehanê girseyîyan awan bikerê. Ma venga pêro partîyanê azadîgîran û rêxistinanê cinîyan zî danê ke hîna zaf paştî bidê cinîyanê Îranî. Partî, rêxistin û dezgehê Îran û Rojhelatê Kurdîstanî seba înşaya demokrasîyî wa serkêşîye bidê cinîyan. Eke cinîyî tede çin bibê ameyoxo azad û têdûşt do nêro ronayene.’’