Koordînasyonê KJKyî bi wesîleya 1ê Gulane Roja Kedkaran a Dinya eşkerayîye daye. Eşkerayîye wina ya:

‘’Ma 1ê Gulane sere de Rayber Apoyî rê pêro kedkar û karkeran rê fîraz kenê. Gulane heman wextî de menga şehîdan a. Ma pêro şehîdanê xo şexsê şehîdanê gulane de bi rêz û minetî yad kenê. Ma soz danê ke têkoşînê kede bi serkewtişî tacîdar bikerê.

Kede erjê komelî yo bingeyîn o û kede komelî kena komel. Coka sîstemo kapîtalîst tim hêrişê kede keno û tewr zaf zî keda cinîyan keno hedef. Cinîyî kole û kedê tewr erzanî yê ke xebate ra yenê dûrkerdene û mîyanê keyeyan de yenê hepskerdene. No sîstem rixmo ke dadîyî 24 saetan mîyanê keyeyî de xebitîyenê keda cinîyan çin hesibneno. Sîstem heqê destê cinîyan nêdano, cinîyî raştê tedaya psîkolojîke û mobbingî yenê.

Karkerî heqê destî yê kêmî gênê, bi hawayêkê keyfî karî ra yenê vetene û raştê cînayetanê karî yenê. Zîretî ra bigêrê heta heywankarîye xebatê tewr girîngî yê ekonomîya merdiman hetê dewlete ra ameyî çinkerdene. Karkerê ke heqê xo wazenê zî werteyê kuçeyan de raştê şîdetê dewlete yenê.

Sîstemê kapîtalîstî pêro enerjîya komelî muhtacê loqmayêka nanî kerdo û xîret keno ke krîzan bi krîzê ekonomîkî binimno. Komel vêşanîye de têrî mendo la sîstemê dewlete yê dizd û çeteyan nêzanenê ke dizdîya xo ça de cabikero. Rayber Apoyî rayîrê felate sey cuya sosyalîste pênase kerd. Sosyalîzm yeno manaya xebate la na xebate xizmetê kapîtalîzmî de nîya xizmetê cuya azade de ya. Coka ma kar û xebatanê xo bivisnê xizmetê cuya azade.

Şarê Kurdîstanî û Rojhelatê Mîyanênî seserrî yo binê kolonyalîzm û îşxalî de yê û dest nîyeno welat û keda înan. Vera ney têkoşînêko welatperwer o pîl û awankerdişê cuya azade û demokratîke lazim o. Heta wina nêbo kede azad nêbena. Keda dadîyan û cinîyan keda tewr qîmetên a. Seba xatirê ked û kedkaran ganî sîstemê serdestîya camêrdan bêro rijnayene. Heta ke cinîyî azad nêbê kede zî azad nêbena. Heta ke cinîyî azad nêbê nêeşkenê cuye azad bikerê û heta ke cuye azad nêkerê zî nêeşkenê kede azad bikerê. Komelo azad û demokratîk o ke Rojawan de ronîyayo netîceya keda cinîyan a.

Her çiqas 1ê Gulane sey roja paştdayîş, yewîye û têkoşînê karkeran o zî ganî ma na roje bikerê awankerdişê sosyalîzmî û caardişê Vengdayîşê Haştîye û Komelê Demokratîkî yê Rayber Apoyî.

Rayber Apoyî bi cuya sosyalîste mojna ke sosyalîzm cuyêk a. Nê bingeyî ser o ma venga cinîyan ê kurdan û pêro cinîyan danê ke seba ke Hemleya Azadîya Rayber Apoyî pîlêr bikerê bi ruhê xoverdayîşî tewrê çalakîyanê 1ê Gulane û Dîyaloganê bi Cuya Azade yê 3yê Gulane bibê.

Ma 3yê Gulane bikerê roja paştdayîşê cuya azade ya bi Rayber Apoyî, awankerdişê cuya demokratîke û pîlkerdişê Hemleya Azadîye.

Nê bingeyî ser o ma venga cinî û ciwanan, dadîyan, dewijan, karkeran, kedkaran danê ke wayîrê nê vengdayîşî vejîyê û têkoşîn bikerê.’’