Koordînasyonê KJKyî  bi eşkerayîya nuştekîye Endama Konseya Rayberdişî ya KJKyî Pelîne Yilmaz a ke 27ê nîsana 2025î de hêrişê dewleta tirke yê vera Herêmanê Pawitişî yê Medya de şehîd bîyî, yad kerd  û merdimanê ci û şarê kurdî rê serweşîye waşte.

Eşkerayîye ra qismêk wina yo:

''Şehadetê embaza ma Pelîna ke endama Konseya Rayberdişî ya KJKyî bî, dejo pîl o, semedê têgêrayîşê ma cayê ci zor beno de. Dewleta tirke ya faşîste seba ke têgêrayîşê ma yê cinîyan ra tersena hêrişê cinîyan ê serkêşan kena. Ma nê hêrişê elçeqî bi nefretî şermezar kenê û soz danê ke ma do semedê hemra Pelîne û heme şehîdanê xo têkoşînê xo yê azadîye bi serkewtişî tacîdar bikerê.

Hemraya ma Pelîna ke eslê xo de Xîzanê Bedlîsî ra ya û Wan de bîya pîl, rewî ra bi zanayîşê polîtîkî têgêrena. Gama ke tewrê têgêrayîşê APOyî bena bi lazebezî xo aver bena û bena cinîyêka serkêşe. Panc serrî  zînndan de manena û tîya açarnena warê perwerdeyî. Zîndan de xebera şehadetê birayê xo gerîla Azad Serbilindî gena. Bado ke zîndanî ra vejîyena cade dest pê xebeta sîyasetê demokratîkî kena. Semedê înşakerdişê sîstemê demoratîk konfederalî yê cinîyan keda girde dana. A hîrê parçeyanê Kurdîstanî de ciwanîye ra heta zîndanî, sîyasetê demokratîkî ra hera dîlomasî, perwerdeyî ra heta înşayê komelkî waranê cîya cîyayan ê têkoşînê ma de keda pîle dana.

Hemraya ma Pelîne cete û hedefanê xo de zelal û tekîlîyanê xo de mutevazî bî. Her ca de rêçê xo verdayêne. Cinîyêka şorişgêre bî her kesî tira hes kerdêne û  ci rê hurmet kerdêne. Vera kulturê koletîye yê zîhnîyetê camêrdê serdestî bêmabên xebetê cuyeya azade û komelê demokratîkî rayraberdêne. Aye fikîr afirnayene û pratîk de serkêş bî. Mîlîtana serkewtîye ya wezîfeyan ê zehmetan bî.

Şehadetê hemra Pelîne ya ke wezîfeyê serkêşîye yê dewrî bi serkewtişî ardêne ca, semedê ma vînkerdişo gird û giran o. Ma têna bi têkoşînê girdî eşkenê bibê layiqê  vînbîyayîşê girdî. Rayber Apo  PKKyî sey partîya şehîdan pênas keno. No yeno no mana ke gerek ma wayîrê têkoşînê şehîdan bivejê û rêça înan de têkoşîn bikerê û xeyalanê înan bîyarê ca. Ma sey KJKyî bi xurtkerdişê têkoşînî do cewab bidê şehadetê hemraya xo Pelîne. Ma şexsê hemraya xo Pelîne de heme şehîdanê xo reyna bi heskerdiş û hesretî yad kenê û sozê serkewtiş newe kenê.''