Şayîyê Koşûyolû yê ke bi slogana “Cuya ya ma ya, vatiş yê ma yo” hetê Şaredarîya Bajarê Girdî ya Amedî ra yenê organîzekerdene roja dîyine de dewam kerd. Parlamenterê HDP’yijî, hemşaredarê HDP’yijî û bi seyan hemwelatijî tewrê şayîye bîyî.

Ameyêne pawitene ke panelê bi babeta “Kultur û cimat“î bêro viraştene, la Mudurîyetê Polîsan ê Amedî destûrê panelî nêda. Yeno pawitene ke rojanê ameyoxan de panel bêro viraştene. Şayîye de Koma Mûzîkî ya MA’yî vejîyaye sehneyî ser û deyîrê hunermendî Mihemed Şêxo û Aram Tîgranî ke hunerê Kurdîyî de wayîrê cayêkê muhîmî yê vatî û hemwelatijê Amedijan verê vengê deyîranê her di hunermendan de kêfweş kerdî. Ciwanan deyîranê kome dir pîya deyîrî vatî û bi coşêkê pîlî govende kerde. Demêkê konserî de ceryan şi û kome bê enstrumanan girseyî dir deyîrî kerdî. Şayîye bi slogana “Amed xover bide” qedîyaye. Çarçewaya şayîye de do roja Çarşemeyî Fîlmê Domanan bêrê ramotene.