Seba ciwîyayîşê ziwanê Kirmanckî ke hetê UNESCOyî ra gîrîyabi lîsteya ziwananê ke vîndîbîyayîşî dir têrî yê Komela Pulurijan a Dêrsimî kewte mîyanê xebate. Serekê komele Alî Ekîcî yo ke seba kurso ke ewro dest pêkerd veng da û waşt ke wa  her kes  tewrê kursî bibo.

Goreyê UNESCOyî ra 18 ziwanî Tirkîye de vîndîbîyayîşî dir têrî yê û mîyanê înan de Kirmanckî (Zazakî) zî esta. Reyna goreyê UNESCOyî xeylî welatan de seba pawitişê ziwananê ke binê tehluke de yê xebatî yenê kerdene.

Komela Pulurijan a Dêrsimî ke Sarigazîyê Stenbolî de ya seba pawitişê ziwanê Kirmanckî ke vîndîbîyayîşî dir ameyo têrî kewte mîyanê xebatan. Komele 15ê Kanûne de yanî ewro dest bi kursê Kirmanckî kena. Kesê ke wazenê qeydê xo virazê eşkenê banê komele de tewrê kursî bibê.   

“MA ZIWANÊ XO NÊMÛSNENÊ DOMANANÊ XO”

Serekê Komela Pulurijan a Dêrsimî Alî Ekîcîyî derheqê kursî de PÎRHA rê qisey kerd. Ekîcîyî bale ante ke ziwanê Kirmanckî ver bi vîndîbîyayîşî şino û vat ke nê têrîameyîşê vîndîbîyayîşî de para keyeyan zî esta. Ekîcîyî vat: “Çira beno vîndî. Çunke ma domananê xo rê nêmûsnenê. Ma ne keye de ne zî teber de bi ziwanê xo qisey kenê.”

Ekîcîyî vat ke ê bi ziwanê maya xo bîyê weî û dimayo ke şîyê mektebe dest bi Tirkî kerda û wina vat: “Gama ma qickek bî mayanê ma Tirkî nêzanayêne. Dima ra ma Tirkî mûsayî û mayanê xo dir qisey kerd la înan ma dir Kirmanckî qisey kerdêne.”

“SEBA VERNÎGIREWTIŞÊ VÎNDÎBÎYAYÎŞÊ ZIWANÎ EREY NÊYO”

Ekîcîyî peynîya qiseykerdişê xo de nê vatî: “Dima ke ma ferq kerd û pêhesîyayî ke ziwanê ma roj bi roje beno vîndî. Ma çende biwazê domananê xo rê nê ziwanî bimûsnê zî seba ke ê bi nê ziwanî nêbîyê pîl nêeşkenê qisey bikerê. La ma ancî zî erey nêkewtî. Na saete ra tepîya eke ma keyeyanê xo de bi ziwanê xo qisey bikerê zî ma eşkenê nê problemî hal bikerê.”

Ekîcîyî ard vîrî ke ziwan tenya bi kursan nêxelesêno la do seba pawitişê nê ziwanî bibê gamêk û veng da her kesî ke xo nê kursî de qeyd bikerê.