Komeleya Kultur û Hunerî ya Dîcle par qezaya Sûrî ya Amedî de ronîyaye. Komele rîyê vîrusê Korona ra mabên dabi xebatê xo yê kurs û kargehî. Komele newe ra dest pê xebatan kena.

Komele de seba kargehanê gîtar, tembûr, erbanê, resim û fotografî muracatî dest pêkerd.

Îdarekaranê Komleye ra Ahmet Yilmazî da zanayene ke ê vera vîrusî tedbîrê xo girewtî û îfade kerd ke seba kurs û kargehan eleqeyêko pîl esto.

Yilmazî vat: ''Ma pêro sinifî dezenfekte kerdî, maske û dezenfekteyê destî zî estê. Ma do hûmara wendekaran kêm bikerê û goreyê mesafeya komelkîye têbigêrê. Her sinife de tewr zaf do 3 wendekarî bibê. Kurdî do peynîya hewteyî de bêrê dayene.'' 

Yilmazî pare kerd ke merdimê pîlî eşkenê beşdarê kurdanê gîtar, tembûr, resim û erbanê bibê û domanî zî eşkenê tewrê kargehê fotografî bibê. Yilmazî vat: ''Sûr seba ma cayêko girîng o. Ma waşt ke îmkanê winasênî pêşkêşê domananê Sûrî bikerê. Ma armanc kenê ke koroyêk zî awan bikerê.''