Komîteya TEV-ÇANDî ya PKKyî serrgêra şehadetê ci de Hozan Sefkan yad kerd. Hozan Sefkanî 16ê nîsana 1985î de şehîd bibi.

Eşkerayîya komîte wina ya:

''Hozan Sefkan (Celal Ercan) pê cuye û têkoşînê xo, pê huner û berhemanê xo tarîx de bi wayîrê cayêkî. Rayber Apoyî vatbi 'Hunermendî şerwanê şarê xo yê, şerwanî zî hunermendê şarê xo yê.' Hozan Sefkan tim nê esasî ser o têgêra û goreyê hewcedarîye ge hunermendîye kerde ge zî gerîlatîye kerde. Nê rayîrî de o şehîd bi û tewrê karwanê bêmergan bi. O hozanê şarî bi û seba azadîya şarê xo ganê xo feda kerd.

Hozan Sefkanî Ewropa û Rojhelatê Mîyanênî de sey neferêkê şoreşî karî kerdî û hunerê xo vist xizmetê şar û şorişî. Ey Şehîde Mizgîne reyde ronayîşê Hunerkome de cagirewt. Ey pê deyîranê xo yê 'Teman Koyu', 'Ha Gerîla', 'Çîyayê Kandîlê', 'Oglu Şehît', 'Kurdun Gelini', 'Destar' kurdayetî û têkoşînê xo ardî ziwan.Hozan Sefkanî xo rê cuyêka komunale û xebatêka kolektîfe esas kerdî nêkewt peyê populîzmî, ezazî. Hozan Sefkan 16ê nîsana 1985î de Heftanîn de 7 embazanê xo reyde şehîd bi.

Şehîd Sefkan 1960 de dewa Laleşoxî ya qezaya Çemişgezekî ya Dêrsimî de dadîya xo ra bi. O vera dişmenî hende hêrsbîyaye bi ke pê hîsê qesasî bi pîl. Ey dejê xo pê hunerî ardî ziwan. Êyê ke Şehîd Sefkan ver bi şorişî berd heskerdişê welat û şarî, kînê vera dişmenî û qesas bîyî.

Şehîd Sefkan û Şehîde Mizgîne sey şehîdanê verênan ê xeta têgêrayîşê ma yê Kultur û Hunerî ameyî qebulkerdene. Ê pê cuye, têkoşîn, kesayet û hunermendîya xo hema zî ma rê mîsal û rayber ê. Nê wextî de ke dişmeno faşîst pê pêro îmkanê xo hêrişê şarê ma keno ganî pêro hunermendî pê ruhê xoverdayoxî yê şehîd Sefkanî xeta înan de şarê xo reyde ca bigêrê û rayberîya şarê xo bikerê. Pê tewirêkê winasênî ma eşkenê cewab bidê Şehîd Sefkanî û wayîrê mîrasê ci vejîyê.

Ma embaz Şehîd Sefkan serrgêra 36. ya şehadetê ci de pê rêz û minetî yad kenê. Heta serkewtişî ma soz danê ke ma do wayîrê hêvîya înan a azadîye vejîyê.''