New partîyê ke HDP, DBP, OSP, PSK, KDP-B, KDP-T, PAK, ÎOP û Însîyatîfê Azadî ra yenê pê awankerdişê “Platformê Ziwanê Kurdkî” ra dima kampanya  daye destpêkerdene. Platformî ewro çarçiwaya kampanyaye de bi slogana ‘‘ Ewro ziwanê maya ma, siba netewa ma‘‘ Komxebata Ziwanî viraşte.

Komxebate ke xeylî parlamenter, hemserekê partîyan, nuştox, şaîr,  ziwannas û aktîvîstî tewrê ci bîyî, qiseykerdişê akerdişî vervatoxê PDK-Tyî Şerefhan Cizîrîyî kerd. Cizîrî bale ante asîmîlasyonê serê ziwanê kurdkî ser û va: ‘‘Eke ma ziwanê xo vîndî bikerê  ma do netewa xo zî vîndî bikerê.‘‘

Sereka diwanî Mulkîye Bîrtane zî muhîmîya komxebate ser o vinderte û va: ‘‘Nika estbîyayîşê kurdan yeno qebûlkerdene la heqê ci yê tewr esasî yenê înkarkerdene. Asîmîlasyonê serê ziwanê ma bi dilab-hîrlab zêdbîyayîşî dewam keno.‘‘

Vervatoxê Têgêrayîşê Azadî Ayattulah Aşitîyî zî Qûran ra nimûneyî dayî û va‘‘ Mûsayîşê ziwanê maye ma ser o farz o.‘‘

Xeylî sîyasetmedar û ziwannsan bînan zî derheqê muhîmîya ziwanê maye ser o qisey kerde û waşt ke vera asîmîlayonê  mucadele bêro girdkerdene, keye, kuçe û her cayê cuye de kurdkî bêro qiseykerdene.

Qiseykerdişan ra dima mabênêk dîya komxebate û bado zî semedê xebata atolye  hîrê grûbe ameyî ronayene.

Grûba yewine do waştişê partîyanê sîyasîyan ê kurdan bigîro rojdemê xo û seba fermîbîyayîşê kurdkî û perwerdeyê bi kurdkî rayapêroyî hadre bikero. Grûba  dîyine  do barê hukmat û burokrasî de teşebusan bikero û nê waştişan biresno ca. Grûba hîrêyine zî do seba ke kurdkî bibo ziwano fermî û ziwanê perwerdeyî mesela bêro rojdemê Yewîya Neteweyan (YN).” 

Roja sêşeme do bi eşkerayîya çapemenîye derheqê kombaxebate de zanayîşo hîra bêro dayene.