Neşrîyatêko newe daxîlê kovaranê Kurdan bi û bi nê qeyde rengêk newe mabênê kovaranê Kurdan de cayê xo girewt. Kovara Folklora Me (Folklorê Ma) roja Newroze dest bi weşanîyayîşî kerd û kovare do 3 mengan de rey bêro çapkerdene. Kovare de derheqê folklorê Kurdan de cigêrayîşî û analîzî ca gênê û Kovare bi ziwanê Kurdkî, yanê bi dîyalektanê ziwanê Kurdîkyî yena çapkerdene.

Folklor kulturo madî û manewî yo

Edîtorê Kovare Eşref Keydanîyî Ajansê Mezopotamya (MA) rê qisey kerd. Keydanîyî bale ante muhîmîya folklorê Kurdan ser û wina va: ”Merdiman tarîx ra nata, cuya xo ya rojaneye de xeylî çiyî afernayî. Merdimahîye tim seba neslanê neweyan zanist, cerebnayîş û tacrubeyê xo aver berdê. Zanist mabênê serran de vurîyayo û zanistê neweyî awan kerdê. Zanistî bi avêrşîyayîşê xo kulturo madî û manewî ardo pêser. Ma zî folklorî sey kulturo madî û manewî name kenê. Sey nimûne yew çeşidê werdî, kulturo madî yo. Sey nimûne, ma rojanê sîyayan de(xemgînîyan de) nêhuyenê. Têkaleke de nîşenê ro û benê xemgîn. Çiyê winasîyî zî babetê manewîyatî yê. Xebatê folklorî bi babetanê madî û manewîyî awan benê.”

Ma herêman ra arêdanê û musnenê

Qaso ke Keydanî vano bi di tewirî xebetînê û nînan ra yew arêdayîş, tewiro bîn zî çiyê ke ameyê arêdayene, înan ser munaqaşayî, analîzî yenê kerdene û bi no qeyde kovare de yenê neşirkerdene. Keydanî vano vateyê verênan, şanikî(estanikî), hîkayeyî, destanî, efsaneyi, vateyî, serebutî, dua, zewtî, nameyê dewan, hênî, ware, çem, cêvîyan û xeylê çiyê bînî ameyê arêdayene û reyna mûzîk, folklor, werdî, şimitişî, kinc-kolî, adet û toreyî û xeylî rîtuelî zî babetê xebatê înan ê          

Teknolojî merdimî kultur û folklorê ci ra raqilneno

Keydanî vano folklorê Kurdan de tesîrê Prof. Dr. Celîlê Celîlî zaf girano û no derheq de wina dewam kerd: ” Celîlê Celîlî moralêko pîl da bi ma û ma motive kerdî. Ma bi paştdarîya ey na kovare vete. Celîlê Celîl vano zeman dişmenê folklorî yo. Dinya her ke şona bena globale. Her roja neweye de teknolojî hîna zêde aver şono û merdiman kulturê ci ra, folklor, nasname û estbîyayîşê ci ra fînayo dûrî. Ma zî naye ser vanê teknolojî û sîstemo kapîtalîst merdimi nêkeno şad û bextewar û  ma kenê ke bi nê xebatan merdiman bikê şad û bextewar.

Seba ke folklorê ma yo dewlemend vîndî nêbo

Ma seba ke folklorê ma yo dewlemend vîndî nêbo xebetînê. Nîyetê ma o yo ke ma Kovare biresnê her cayê Kurdistanî û biresê dewlemendîya folklorê Kurdan ê her herême. Folklorê Kurdan yew derya yo. Ma seba ke nê deryayî biresnê şarê xo, bi ruho kolektif xebetînê. Na dewlemendîye hêz dana ma. No folklor ê ma yo û coka ma nameyê kovare folklorê ma nayo pa. Ma wazenê ke pêro Kurdî wayîrê folklorê xo bivejîyê.”