Kovara GOGî kovarêka xêzeromanî ya û bi kirdkî û kirdaskî weşanîyena. Kovara GOGî înternetî ser o weşanîyena û nameyê xo nameyê kayêkî ra gêna. Kovare de Dogan Guzel karakterê 'Qirix', Ender Ozkahraman 'Hîkayeyê Ê Çaxî', Îmam Cîcî beşê 'Nê kam ê' xêz kenê. GOG de efsaneya Şahmarane zî esta ke hetê Evdal Canî ra ameye xêzkerdene.

Mudirê Weşanê Pêroyî yê kovara GOGî Îmam Cîcîyî ANFyî reyde qisey kerd û armanc û hêvîyê kovare ardî ziwan.

Cîcîyî eşkera kerd ke eke domanî kulturê xêzeromanî reyde bibê şinas eşkenê ziwanê xêzeromanî bixebitnê û tradîsyonêkê winasênî awan bikerê.

Cîcîyî bale ante ser ke semedo ziwanê kovare kurdkî ya karê înan zêdêr zehmet o û vat: ''Dewlete de fobîya kurdkî esta, ma de kulturê xêzeromanî çin o, neslê ma de kurmê wendişî qedîyeno, xêzkarê ma kêm ê, qanûnê bazirganîye yê tirkan destûr nêdanê sîteyê ma têna bi kurdkî bibo, xêzkarî pê nuştişê kurdkî qerqilîyenê. Na rewşe de pêro berardişî zehmet ê la berardişê bi kurdkî hîna zehmet o.''

Cîcîyî derheqê tedeyîya kovare de nê agahîyî dayî: ''Kovara ma de tay karakterê xerîbî estê ke newe açarîyayî kurdkî. Kovara ma de karakterê sey Red Kit, Yakari, Thorgal estê. Ma ra zî Qirix, Şahmarane û Porsor estê.''

Îmam Cîcîyî venga pêro wendoxanê kurdkî da ke wa wayîrê kovara GOGî vejîyê. Cîcîyî vat: ''Ma armanc kenê ke xo biresnê teberê welatî. Coka ma platformanê dijitalan de kovara xo weşanenê. Xoresnayîşê bi kurdkî zehmet o. Ê ma seke ma hê koyêkê vewrêne rayîr akenê. Wayîrê GOGî vejîyê ke wa ziwanê ma xêza xo bivîno.''