Kovara Vateyî ke serra 1997 ra nata bi hawayo sîstematîkî safî bi kirmanckî vejîyena, hûmara ci ya 57. vejîyaye. Na hûmare zî bi nuşteyanê cîya-cîyayan pirr a. Na hûmare de şîîre, roportaj, meqale û sewbîna ca gênî.

Nuşteyê redaksîyonî yê Kovare de ca dîyayo muhtewaya na hûmare. Goreyê nuşteyê redaksîyonî na hûmare de ca dîyayo nuşteyê Munzur Çemî ke qala herêmêka Spanya Endulusî kena û nuşte wina dewam keno: “Nuştox nê hamnanî şîyo ewja de gêrayo û çîyê ke dîyî ser o nuşto. Dima tarîx, kultur, Malaga, Picasso, Elhemra, dansê flaminco, turîzm û gelek çîyanê bînan ser o, bi yew ziwanê sivik û weşî nuşteyêde înformatîf nuşto.”

Dewamê nuşteyê redaksîyonî de ca dîyayo nuşteyanê bînan û wina ameyo vatene: “Na hûmare de nuşteyê balkêşî yê bînî zî estî. Eke bêro vîrê şima çend hûmaranê Vateyî yê verênan de derheqê tayê kar û gureyanê xaman de nuşteyî weşanîyabîyî, mavajî ramitiş û hasilkerdişê tutinî, kar û barê weyekerdişê rezan ûsn. Na hûmare de zî Mehmet Topal viraştişê ‘cilanê heywananê barî’ ser o xebîtîyayo. şSemedo ke nuştox bi xo zî nê karî zano, na babete ser o gelek detayanê zaf hurdîyan ser o zî vindeno. Heme malzeme û hacetanê nê karî, tewir bi tewir cilanê barî û xususîyetanê înan yê muhîman, senetkaranê namdaran yê derûdora Dîyarbekir, Riha û sewbîna gelek çîyanê bînan hem nuseno û hem zî bi fotografanê gelek weşan musneno ma.”

DAYÎŞŞINASNAYÎŞÊ HERÊMAN DEWAM KENO

Reyna nuşte de ameyo vatene ke na hûmare de tayê nuşteyê dayîşşinasnayîşê herêmanê cografîkan zî ca girewto û nuşte wina dewam kerdo: “Aydin Batur dayîşşinasnayîşê herêmanê cografîkan yê welatê ma domneno. Hûmara 56. de herêma Azarpêrtî (Azaxpêrtî) nuştbî, na hûmare de zî herêma Xorxolî dano şinasnayene. Seke nameyê nuşteyê ey ra zî fehm beno na herême de di koyî namdarî estî; nê koyî hetê bawerîya kurdanê elewîyan û armenîyan ra bimbarek î, bitaybetî koyê Sulvisî. Nuşte derheqê demografîyê herême de û têkilîya tayê hedîseyanê tarîxîyan û nê cayan de zî gelek melumat dano. Pinar Yildize bi minasebetê tezê xo yê masterî fekê kirmancanê Qerejdaxî ra tayê sanikî zî arê dabîyî. Zafaneyê nê sanikan fekê gedeyan ra qeyd kerdî. Nê sanikî naskerdişê kirmanckîya na herême ra teber, hetê fehmkerdişê prosesê bedilîyayîşî ziwanî ra zî muhîm î.”

ROPORTAJ, ŞÎÎRE, HÎKAYE Û FIQRAYÎ

Nuşteyê redaksîyonî de ca dîyayo roportaj, hîkaye û sewbîna zî û wina vato: “Nuşteyê bînî yê na hûmare nê yê: Mutlu Canî roportajêde kilmek ke kovara Psycology Kurdî ya ke kurmanckî vejîyêna, M. Malmîsanijî reyra kerdo, çarnayo kirmanckî ser. Seyîdxan Kurijî hîkayeyêda bi nameyê ‘Payîzê Merdiş Zor o’ nuşta. Welat Ramînazadî ehemîyet û bi hawayêde kolektîf arêdayîşê folklorî ser o yew meqale nuşta. B. Şîlanî na hûmare rê zî di fiqrayî şawitî. Şîîrê na hûmare hetê MM, Pinar Yildize û Akman Gedîkî ra nusîyay.”

Çime: Yenî Ozgur Polîtîka