Şaristanê Bernî yê Swîsre de Festîvala Tour de Lorraine 20ê nîsane de dest pêkerd û do heta 30ê nîsane dewam bikera.Merkezê Komelê Demokratîkî yê Kurdan (NCDK) ê Bernî zî beşdarê festîvala bi. Çarçewa festîvale de bi sernameyê ''Serra 100. de Peymana Lozanî û Kurdî'' û ''Şorişê Rojawanî, Jin, Jiyan, Azadî'' di panelî ameyî kerdene. Hunermendê kurdî Tuncay Akbabayî zî hunerê xo pêşkêş kerd.

Panelê ''Serra 100. de Peymana Lozanî û Kurdî'' de Endama YJK-Syî Ozene Aytaç pêşkêşwanîye kerde û ard ziwan ke Kurdîstan bi Peymana Lozanî bi çar parçeyan ameye kerdene. Aytaçî îfade kerd ke ê do nêverdê ke îşxalê Kurdîstanî 100 serran reyna dewam bikero.

Panelêkê bînî de ''Şorişê Rojawanî û Serewedaritişê Jin, Jiyan, Azadî'' de Endama TJK-E Asmîne Engîn pêşkêşwazîye kerde. Panel de qala têkoşînê azadîye yê Rojawanî û têkoşînê azadîye yê cinîyan ameye kerdene. 

Asmîne Engîn vat: ''Rojawan de bingeyê azadîya cinîyan de YPJ ronîya. Serê bingeyê Konfederalîzmê demokratîkî de ferasetê 'Jin, Jiyan, Azadî' ame afernayene. Ewro no feraset Rojhelatê Kurdîstanî, Îran û Rojhelatê Mîyanênî de vurîya felsefeyêke. Afrnayoxê ney zî Abdullah Ocalan o.''

Dima hunermend Tuncay Akbabayî zî hunerê xo pêşkêş kerd.

Peynîya bernameyî de seba paştdayîşê serewedaritişê Rojhelatê Kurdîstanî beşdaran gijikê xo qesna.