Hunermendê Tîyatroyê Şaristanî yê Amedî Ozcan Ateşî derheqê girîngîya tîyatroyê bi kurdkî de ANFyî rê qisey kerd.

Ateşî dîyar kerd ke prensîbê înan o ke bi tirkî tîyatro nêkenê û vat: ''Ma hertim kayanê bi kurdkî pêşkêş kenê. Şarê kurdî bi serran o seba kurdkî têkoşîn keno. Ez 20 serrî yo pa embazan tîyatro kena. 2016 de dima ke şaredarîye rê qeyûm ame tayînkerdene, ma şaredarîye ra ameyî eştene. Înan armanc kerd ke ma verê xo bidê kanalanê tirkî. Tay dezgehanê Ewropa paştî daye ma ke ma uca de tîyatroyê xo bikerê. La ma waşt ke tîya de bimanê, kultur û hunerê xo rê bi ziwanê xo dewam bikerê.''

Ateşî da zanayene ke ê biserran o tîyatroyê bi kurdkî kenê, kulturê populerî ra dûr ê û no tercîhê înan o. Ateşî vat: ''Mamostayêkê mi est bi, vatêne eke ez û embazê min ê sey Yavuz Akkuzu bikewê bazarê Îstanbulî ma do zaf namdar bibê. Heta ey ma rê teklîf kerd ke do menajerîya ma bikero. La ma no qebul nêkerd. Hunermendî serkêşê şarî yê. Eke ma meseleyêka qije de şorê, ma do hunermendîya xo ra fek vera bidê. Ma do xîret bikerê ke tîyatroyê bi kurdkî aver şoro. Beno ke ma mîyanê sîstemî de bibîyêne wayîrê îmkananê holan la eke merdim mîyanê şarî de bêqîmet bibo hînî girîngîya şarî zî nêmaneno.''