Mîhrîcana Govendên Kurdîstanî ya 34ine bajarê Hannoverî yê Almanya de qedîyaye. Mîhrîcane bi şîarê 'Kulturê ma nasnameyê ma yo' ameye kerdene û di rojan dewam kerd. Almanya, Swîsre û Fransa ra pêro pîya 23 komî tewrê mîhrîcane bîyî.

Hunermend Hozan Xanemîr, Diyar Mehrovî, Baran-Serhat û Serhan zî mîhrîcane de vejîyayî sehne ser.

Nameyê Komîteya Amadekarîye ser o Welî Botîyî qisey kerd û ard ziwan ke Mîhrîcana Govendên Kurdistanê ya 34. yew şayîya kulturî ya coka pêro ciwanê beşdarî bîyê yewin. Botîyî vat: ''Oyo girîng wayîrvejîyayîş û pawitişê nê kulturî yo.''

Temsîlkara TEV-ÇANDî Dîroke Vîyan zî pare kerd ke vera polîtîkayanê asîmîlasyonî aktîvîteyê winayênî zaf girîng ê. 

Hemserekê Meclîsê Şarî yê Hannoverî Rêwî Rêdûrî zî pare kerd ke seba înan sereberzî ya ke meymandarîya mîhrîcane kerda û vat: ''Ma ciwananê xo fîraz kenê ke wayîrê kulturê xo vejîyenê.''

Mîhrîcana Govendên Kurdistanê ya 34ine de Koma Şîyarî ya ke şaristanê Salzgitterî ra tewre bîya, bi govenda herêma Wêranşarî bîye koma yewine. Koma Evîna Welatî ya şaristanê Baselî ra tewr bîya, bi govenda Bedlîsî bîye koma diyîne û Koma Laleşî ya ke Celle ra tewra mîhrîcane bîya, bi govenda xo bîye koma hîrêyîne.

Koma Faraşînî û Koma Şehîd Delîl Çîyagerî yê ke Berlinî ra tewrê mîhrîcane bîye layîqê Xelata Taybete ya Jurî ameyî dîyene.

Xelata Kostuman zî dîyaye Koma Cinîyan a Evîne Welatî û Xelata Cigêrayîşî zî dîyaye Koma Kulîlkên Welatî ya Duisburgî.