Êlih de amadekarîya Festîvala Fîlman a Yilmaz Guneyî ya 8. ya ke mabênê 26ê sibate û 1ê adare de do bêra kerdene dewam kena. Festîvale armanc kena ke fîlmê ke raştê sansurî ameyî, nêameyî mojnayene pêşkêşê şarî bikera. Çarçewa festîvale de fîlmê dergî, fîlmê kilmî û fîlmê dokumenterî do bêrê mojnayene. 

Festîvala Fîlman a Yilmaz Guneyî de bi beşdarbîyayîşê kaykerdoxan, îdarekaran, senarîstan û nuştoxanê sînema panel û konferansî zî do bêrê serûberkerdene.  Festîvale do 26ê sibate de dest pêbikera û muracatî 25ê çeleyî de do biqedê. 

Hemserekanê Şaredarîya Êlihî Songule Korkmaz û Mehmet Demîrî da zanayene ke emser beşê musabeqa ame wedaritene û herinda ci de beşê averberdiş û paştdayîşê projeyan ame awankerdene. Hemserekan vat: "Seba ke ma hetkarîye bikerê berhemkaranê sînema, çarçewa Beşê Averberdiş û Paştdayîşê Projeyan de ma do qasê  10.000 TLyî xelate bidê 2 projeyan û çarçewa Beşê Averberdiş û Paştdayîşê Fîlmanê Kilman de zî ma do qasê 10.000 TLyî xelat bidê 2 projeyan."