Sazkerdoxanê MKMyî ra Celal Ekînî behsê Evdilmelîk Şêxbekîrî kerd ke serranê 90an geşbîyayîşê muzîkê kurdî de wayîrê rolêkê girîngî yo.

Kurdê çar parçeyanê Kurdîstanî seba ke wayîrê statûyêkê sîyasîyî nêbîyî tim hetê dewletanê mêtingeran ra ameyî qrikerdene. Sere de qirkerdişê fîzîkîyî, qirkerdişê kulturî zî hetê dewletanê mêtingeran ra vera kurdan ameyî kerdene. Dima ke têkoşînê azadîya kurdan serranê 80an de tarîx vurna kulturê kurdan zî dest pê geşbîyayîşî kerd. Hînî muzîkê kurdkî ameyêne eşnawitene û bîyêne wayîrê dezgehan. Komanê muzîkî yê bi kurdkî ameyêne awankerdene û seba ke kulturê kurdan bêro geşkerdene dezgehî ameyêne akerdene.

Evdilmelîk Şêxbekir Rojawanê Kurdîstanî ra seba ke tib biwano yeno Tirkîya û Gulşen Çetîn, Savaş Çakmak, Rohat Kutlay, Fikrî Kutlay, Mustafa Kart û Ahmet Kaya nas keno. Dima awankerdişê kome dest pêkeno. Nê kesî yenê têhet û Koma Amed awan kenê. Bi nameyê qodî Melek yanî Evdilmelîk Şêxbekîr Rojawan ra yo û resamêko jîhat o. Şîîranê weşan nuseno. Melek wextêkê kilmî de tirkî museno.

Dima ke Ahmet Kaya, Rohat Kutlay, Gulşen Çetîn û Mustafa Kart zî tewrê kome benê verê kome yeno girewtene. Seba ke kurdkî qedexe ya bi hawayêkê nimitkî keye de xebatanê xo kenê. Mîyanê şert û mercanê 12ê êlule albumê yewînî vejenê. Album ra dima Melek serra 1991î de verê xo dano koyan û beno gerîla. 5 mengan ra dima zî şehîd beno. Sazkerdoxanê Merkezê Kulturî yê Mezopotamya (MKM) ra Celal Ekîno ke şahîdê cuya Melekî bi ANFyî reyde behsê Melekî kerd.

Ekînî vat: "Dima ke ma MKM saz kerd Melekî ma reyde têkilîye kerde û vat ê endamê Koma Amed ê la seba ke tim nêeşkenê bêrê têhet û kome hêdî hêdî vila bena wazeno Koma Çîya reyde dewam biko. Melek bi nizamî ameyêne xebatan. Her tim zaf goş dayêne deyîran ser, tim persayêne ke kamyew çeku yena kamyew mana. Melekî çîyanê ke cografyaya xo de dîyî xîret kerd ke sena nînan çare bibo û rêxistinîya ci biko."

"Dima ke mi na hîsgerîya ci dîye wexto mi bala xo daye deyîranê ci ser. Embaz Evdilmelîk zaf bikelecan bi. Tim waştêne ke sere biwedaro. Dima ke tekilîya ma yê bi ey qedîyaye ma zaf bêrîya tewirê ci yê serewedarteyî kerde û hîs kerde."

"Melekî seba Rojawanî deyîra 'Lêlê Rindê' ya Meletî arê dabî û deyîra tirkî ya 'Tellî Tellî' açarnaybî bi kurdkî. Cografyaya ma de Alî Temel, Mihemed Şêxo, Eyaz Yusif û Erdewan Zaxoyî estbî. Wexto ke nê hunermendî behsê welatê xo kerdêne bi hawayêkê cîyayî wasifê ci dayêne. Reyna Ozane Mizgîne, Ozan Serhat  û Delalîyayî estî. Nê heme tewirê cuya înan Kurdîstanî bi. Na çarçawe de ganî hunermendî tewirê xo ser bifikîryê.