Komîsyonê Kultur û Hunerî yê Freie kurdische Gemeinde e. V (Merkezê Kurdîstanijanê Azadan ê Berlinî-Nav-Berlin) beşanê tembur, govendanê herêmîyan, def-erbane, tîyatro, koroyê domanan û kursê ziwanê kurdkî de xebatanê kultur û hunerî serûber keno.  Komîsyonê Kultur û Hunerî yê Nav-Berlinî xebatanê xo yê termînê neweyî rê dewam keno.

Komîsyonî ra Mustafa Ergunî derheqê xebatanê înan de ANFyî rê qisey kerd.

Ergunî da zanayene ke sey Komîsyonê Kulturî înan dest pê kursanê govende kerdo û vat: ''Ney ra ber kursê ma yê tembûr, koroyê domanan, ziwanî est ê. Ma her termîn dest pê xebatanê neweyan kenê. Wendekarê neweyî yenê. Hem Berlin de hem zî binê sîwana TEV-ÇANDî de wendekarê ma yê verênî xebatanê xo domînenê. Ma kulturê xo bi nê xebatan gandar verdenê.''

Ergunî bale ante tarîxê govende ser û vat: ''Govendî wayîrê hîkayeyanê cîyayan ê. Mîsal govenda Yarê yê herêma Gimgimî ya. Na govende ma têrî û têdestî giran giran kay kenê. Hîkayeya na govende zî eşqî ser a. Di ciwanî yewbînan ra hes kenê la keyeyê înan ra yew feqîr, oyo bîn zî zengîn o. Na govenda şînî ya. Senî ke Kurdîstan de merasîmêk yeno serûberkerdene merdimî serê şinî de govende gênê.''

Ergunî pare kerd ke hîrê komê govende est ê û vat: ''Koma domanan saete 12.00 ra heta 13.00 dewam kena. Naye ra ber koma ciwanan û koma profesyonelan est a. Na koma profesyonelan qasê 5 serrî yo govende kenê. Ganî her kes beşdarê nê kursan bibo. Seba ke ma kulturê xo gandar verdê ma ganî bimusnê domananê xo. Ez bi xo baxçeyê domanan de xebitîyena. Wexto ke tîya de muzîk yan zî rîtmêk est bo domanî rayêk zî bivînê bi kêfweşî govende gênê û musenê.''