Dimayê zextê serê Mîr Muzîkî û Weşanxaneyê Mezpotamya û qerarê girewtişê înan hunermendan tewirê xo ramot.

Deyîrbaz Cewad Merwanîyî bi vîr ard ke verê nikayî zî serê nê di sazîyan de ameyo girewtene û heme eserê înan ameyê desteserkerdene û wina dewam kerd, “No reya dîyin a hêrişêkê nêhuqûqîyî kenê û erzenê serê înan. Gama ke merdim ewnêno tewirê înan ra, hawayê hêrişî ra, seke polîsê Tirkan bi hezaran kîlometre dûrî ra ameyê û eştê serê nê sazîyan.” Merwanî vat, “Ma kenê ke kultur û muzîko ke 5 hezar serrî yo heta ewro ameyo bidê ciwînayene” û wina dewam kerd, “Nika ê eşkenê tîya bigîrê la ma do yewna akerê. Bi nê zextan nêeşkenê vernîya xebatanê ma yê seba dewamkerdişê kultur û tradîsyonî bigîrê.”   

MA PÎYA MUCADELE BIDÊ

Deyîrbaze Denîz Demane vat Almanya sey polîtîkayanê faşîstan ê dewleta Tirkî nizd bena, ard ziwan ke dewleta Almanî seba ke zerrîya Erdoganî bikero weşe bi nizdbîyayîşanê qedexekerdoxan paştî dana hêrişan. Demane hêrişê serê sazîyanê Kurdan şermezar kerd û vat, “ma veng danê heme deyîrbaz û demokratan ke hemverê na hişmendîya qedexekerdoxe de mucadele bidê.”

 ‘KEYEYÊ MA SEY SAZÎYANÊ HUNERÎ YÊ’

Deyîrbaz Farqîn Azadî zî vat Almanya 1993’an ra tepîya hêrişê Kurdan kena û erzena sazîyanê demokratîkan ê Kurdan ser, têkilîyê leyminî yê mabênê Almanya û Tirkîya de ardî vîrî û vat, “Key ke bazarîyan kenê, hêrişan benê serê sazîyanê Kurrdan, sîyasetkaranê Kurdan destbend kenê û înan erzenê zîndanan” û wina dewam kerd, “Bi girewtişê sazîyanê Kurdan eke vanê qey ê do bieşkê vernîya kultur û hunerî bigîrê ê xelet ê. Çunke keyeyê Kurdan sey sazîyanê kultur û hunerî yê, bi ziwanê xo qisey kenê û bi kulturê xo ciwîyenê. Ganî Almanya peynî ro zextanê xo yê serê Kurdan bîyaro.”  

DO MUCADELE DEWAM BIKERO

Deyîrbaz Kawayî zî vat, “Wa çew nêpawo ke ma do bêveng bimanê. Ma heqê xo wazenê, azadîya şarê xo wazenê. Şarê ma Rojawan, Vakûr û Başûr de zî heqê xo wazeno. Ma nêeşkenê hemverê nê hêrişan de bêveng bimanê.”

ŞERMÊ ALMANYA

Hozan Xemgîn Bîrhato ke 4 serrî îdareyê Mîr Muzîkî de mendo vat, “Bêvengkerdişê hunermendan, girewtişê weşanxaneyan vizêr Almanya de karê Hîtlerî bi. Rixmo ke Almanya nê şermî ciwîyena zî bi heman metodî serê Kurdan de şina. La se beno wa bibo Kurdî do bêveng memanê û rayîrê xo bidomnê.”   

BIHÊRS A

Hozan Îdrîs Bagokî zî vat, “Almanya Kurdan rê zulm kena. Kurdî nê vîr ra nêkenê. Almanya tarîxê xo ra derse nêgêna? Hewna vizêr kitabî ameyî vêşnayene, muzîk ame qedexekerdene, serê şaran de qirkerdiş ame bicaardene. Nê şermî qîmê Almanya nêkerd? Ez nê şermezar kena, hemverê nê de bihêrs a.”

Hozan Rêberî zî vat, “Ganî Kurdî dorê sazîyan de bêrê têhet, biisrar mucadeleyê azadîye, hunermend, sazî û sîyasetkaran rê wayîr vejîyê.”

ÊYÊ KE DEYÎRAN VIRAZENÊ XURTÊR Ê

Sethat Çarnewayî zî vat, “Ma wina çaxêk de ciwîyenê ke bê xoverdayîşî tu rayîr Kurdan rê nêmendo. Êyê deyîranê neteweyêk virazenê, qedexekerdoxan ra xurtêr ê. Ma do bi na slogane hîna zaf ber bidê, prosesî rê bibê cewab.”  

Çime: Yenî Ozgur Polîtîka