Weşanxaneyê Wardozî ke Amed de xebatanê folklorîkan ser o fealîyetan keno xebatêka bi nameyê “Dergilerin Folklor Seti (Seta Folklora Kovaran)” vete. No set 3 kitaban ra yeno ra. Nûşteyê Hawarî hetê Mehpûs Serhedî, yê ke kovara Ronahî de bî hetê Mem Mukriyanî û yê ke kovara Roja Nû de bî zî hetê Rênas Xendekîyî ra ameyî arêdayene.

‘WARDOZ SEBA KE FOLKLORÊ KURDAN VÎNDÎ MEBO XEBETÊNO’

Seto ke tede bi seyan nûşteyî estê, ci de babetê sey hîkaye, fabl, estanike, destan, efsane, kilam, deyîr, lorî, vatiş, vatişê verênan, eşîret, coxrafya û tarîx ameyê tesnîfkerdene. Edîtorê weşanxaneyî Bahoz Baranî derheqê xebata setî de Ajansê Mezopotamya (MA) rê qisey kerd. Baranî nê vatî: “Folklorê ke hem roja ma ya ewroyî de û hem zî yê ke verî ameyê qeydkerdene estê. Ma zî xebatanê ewroyênan de înan anê têhet. Wazenê ke biresê berhemanê xo yê folklorîkan ê tarîxîyan. Seba şar e metnan hîna asan biwano ma nê xebatan kenê.”

‘XEBATÊ VERÊNÎ EWROYÊ MA KENÊ ROŞIN’

Baranî wina dewam kerd: “Ma mîyanê xebatanê Bedirxanîyan de roşnayîya folklorî zî dîye. La ê heme yewbînan ra dûrî, vila û cayanê cîya cîyayan de bî. Ma zî waşt ke înan biyarê têhet. 3 embazê ma ê nûşteyê ke xeylî wareyanê edebîyatî de ê kovaran de ameybî nûştene ser o vindertî û ê yew bi yew arê dayî. Amacê ma no bi ke wendoxî ê nûşteyan bi asanî bieşkê biwanê. Naye ra ma rastnûştişê her hîrê kitaban zî goreyê ewroyî viraşt. .”  

Peynîya qiseykerdişê xo de Baranî nê vatî: : “Qasê serrêk esto ke ma nê projeyî ser o xebetênê. Ma nêwaşt ke kovarî bêrê kopyakerdene. Na yewe ra ma ê heme yew bi yew bi dest nûştî. Seba ke çekuyê folklorîkî hîna asan bêrê famkerdene ma peynîya her hîrê kitaban de zî ferhengêk bica kerd.”