Bi zîhnîyetê ''yew ziwan'' ''yew netewe'' zaf bawerîyan û ziwanan ser o tedayêka pîle yena kerdene û bi nê hawayî zaf ziwanî binê tehlukeyê vînbîyayîşî de yê. Nê ziwanan ra yew zî kurdkî yo. Torra Ziwan û Kulturan zî  nê esasî ser o ronîyaye û armanc kena ke têkoşînê estbîyayîşê kurdkî bida.

Hemşaredara Verêne ya Erdîşî Dîba Keskîn a ke serra 2015î de amebî tepiştene û serra 2019î de ameye veradayene û nuştoxe Leyla Mîhrînaz Engîn zî bi qalemanê xo tewrê têkoşînê estbîyayîşê kurdkî benê.

Dîba Keskîn kurdkî sey ''welat û şarê xo'' pênase kena. Dîba vat: ''Kurdkî seba mi cuye ya. Ma perwerdeyê bi kurdkî nêvînenê. Coka nuştiş û wendişê bi ziwanêkê bînî beno fermî. Ma seba ke kurdkî vîn nêba têkoşîn kenê. Eke kurdkî vîn biba ma zî do vîn bibê.''

Dîba bale ante ser ke eke kurdkî her ca de bêra xebitnayene dezgehanê dewlete de zî do bêra xebitnayene. Dîba vat: ''Tirkî nêwazenê ke kurdkî fam bikerê. Ê armanc kenê ke pêro şarê bînî muxtacê înan bibê. Vera naye ganî ma têna pê qiseykerdişê ziwanê xo qîm nêkerê û bi kurdkî binusê, cibigêrê, ci ra hes bikerê û aver berê.''

Kitabê şîîranê Dîba yê bi nameyê ''Bênderî'' ame weşanayene. Dîba şîîrê xo zîndan de û bi temamî kurdkî nuştî. Dîba derheqê kitabê xo de vat: ''Nêame mi vîrî ke ez tirkî binusa. Seba ke mi pê ziwanê xo nuşt mi pê heskerdişî nuşt. Ma bi serran o ke seba ziwanê xo têkoşîn kenê la no qîm nêkeno. Ganî ma hîna zaf kede bidê ziwanê xo.''

Nuştoxe Leyla Mîhrînaz Engîn zî qala têkoşînê cinîyan ê seba ziwanê xo bi nuşteyanê xo kena. Leyla îfade kerd ke kurdî cografyayêka hîra de ciwîyenê û wayîrê edebîyatekê hîrayî yê. Leyla vat: ''Kurdkî ziwanêko zengîn a. Coka yeno waşytene ke kurdkî çin biba. Ma vera nê xîretan ganî wayîrê ziwanê xo bivejîyê û bi ziwanê xo qisey bikerê. Dinya de bi mîlyonan kurdî esto. Yanî bi mîlyonan tradîsyonî û kulturî estê. Vera çinhesibnayîşî ganî ma wayîrê ziwanê xo bivejîyê.''