Kongre de se roşinvîr û nuştoxê çar perçeyanê Kurdistanî û dîasporayî ameyî têhet. Kongre de ame nîşandayene ke her dem ra zêdetir hewcedarîye bi yewîya neteweyî ya Kurdan esta.

Roja destpêkî ya kongre de meymanan yewbînî nas kerd û pêşkêşî ameyî kerdene. Roja dîyine de zî karê PEN a Kurdî ya Mîyanneteweyîye ameyî ercnayene.

Hûmara endamanê rayberîye bîye 15 kesî.

Dimayê munaqeşeyan rêziknameya PEN a Kurdî ameye amadekerdene û pêşnîyazîyî ameyî kerdene, ke bedilnayîşê di madeyan ame pêşkêşkerdene.

Na çarçewa de hûmara endamanê rayberîya PEN a Kurdî bîye 15 kesî. Înan ra 6 kesî esîl, 6 zî do cagirî bibê. Dimayê kombîyayîşî rayberîya Hemserekîya PEN a Kurdî rê Samî Tan û Aslihan Yildirime ameyî weçînayene. Kongre do hîrê serran de reyêk bêra viraştene.

Plansazîya demê ameyoxî

Kongre de Berîvan Dostkî û Şêrzad Hesen sey serekê rûmetî yê PEN a Kurdî ameyî weçînayene. Beşanê bînan ê kongre de planzasîye ameye amadekerdene. Na çarçewa de qerar ame girewtene ke wareyê ziwan û edebîyatî de muxatabê mîyanneteweyan reyde têkilîyî bêrê xurtkerdene. Plansazîya bîne zî wina ya:

- Babeta ziwan, edebîyat û kulturî de konferans û kombîyayîşî bêrê viraştene.

- Perçeyanê Kurdistanî de goreyê şert û mercan kar bêro kerdene, konferans û kombîyayîşî bêrê viraştene.

- Karê aşitîye yê wareyê mîyanneteweyî bêrê teqîbkerdene û tewrbîyayîşê înan bêro kerdene.

- Kongreyê PEN ê Mîyanneteweyî yê ke serrane yenê viraştene, temsîlîyet bêro kerdene.

Xeylî rêxistinanê PEN’î ra peyamî ameyî û PEN’a Almanya zî sewîyeya temsîlkarîye de tewrê kongre bîye.

Kongre de bale ame antene serê nê çîyî ke ganî xebatan de ca bidê heme fekan û zaravayanê Kurdkî. Ame vatene ke mabênê zaravayan de ganî pirdî bêrê awankerdene.