Seba bajarê Silêmanîye vanê bajarê şaîr, nûştox, roşinvîr, peykertaştox, resimkar, muzîsyen û bajarê serewedartişî.

Mehlaya Melîk Mahmûd a Silêmanîye de cayêk bi nameyê Saxuleke esto. Şanînan merdimî nê meydanî de yenê têhet. Xeylî kesî zî seba ke bieşkê debara xo bikerê Saxuleke de kar kenê. Nînan ra yewe zî Xezal Lutfî ya ke resiman virazena.

Xezal Lutfîya 28 serrî Silêmanîye de amîya dinya û ûca bîya pîle. Emrê domanîye de resimî bala aye ancenê. Pîyê ci aye rê seba viraştişê resiman çî-mîyan gêno. Nika wendekara sinifa çarine ya kolejê hunerî ya. Xezale seba ke keyeyê xo yê feqîrî rê nêbo bar lîse ra tepîya bi pereyan dest bi viraştişê resimanê merdiman kena.

Hîkayeya Xezal Lutfî tena hende nêya. Qismo tewr muhîm ê hîkayeya aye yo bidej cîya yo. Rixo ke aye Silêmanîye de amîya dinya û bîya pîle zî a xo sey merdimêka Silêmanîyeyije nêvînena. Gama ke aye ra yeno persayene ‘ti ça ra ya?’ A vana ‘ez koçber a.’ Xezale vana, “Ez bajarê Saqizî yê Rojakewtene ray a. Mi hewna zî bajarê xo nêdîyo. Pîyê mi welatperwerêko Kurd o, tewrê mucadeleyê Kurdîtîye bi. Gama ke Hûmeynî bi îqtîdar zext û îşkenceyî ra rema û pîya bi maya mi ameyî Silêmanîye.

Dimayê serra 2000’î gama ke kampî ameyî vilakerdene bajar de bica bîyî. Ma zulm û zorî ver a perçeyêkê Kurdistanî ra remayê û ameyê perçeyêkê bînî yê Kurdistanî. Ma Kurd ê, Kurdistanij ê, labelê seke ma koçber ê nizdê ma benê. Tirêm nê ra xirabêr çîyêk esto ke merdimî welatê xo de sey koçber bêrê dîyene?”