Organîzasyonê Efû yo Mîyanneteweyî yê Beşê Tirkîye bi wesîleya serragêrayîşê 70. yê Beyannameyê Heqanê Merdiman o Unîversalî DEPO Stenbol de mîyanê înan de xebata Zehra Dogane zî tede pêramotişêk bi nameyê “Resimo Pîl” organîze kerd.

Pêramotişo ke 20 Teşrîna peyêne de dest pêkerdibi û do heta 30ê Kanûne dewam bikero de xebatê derheqê Tirkîye de binpaykerdişê heqanê merdiman estê. Na xebata ke pênaseyê serdestan ê resimê pîlî krîtîk kena, ana ziwan ke vateyê “resimo pîl” îluzyonêkê serdestan o.

RESIMÊ CENAZE YÊ ZEHRA DOGANE

Pêramotiş de xebata bi nameyê “Cenaze” ya resam Zehra Dogana ke muxabira ajansê JINHAyo ke bi qerarê KHKyî yê OHALî amebi girewtene zî esta. Dogane Cenaze de qalê dewrê ablûqayan kena. Mîyanê xebatan de xebata “ÎSTÎQRAR”î ya Arzu Yayintaş û Nerîman Polata ke 2016 de înan bi 3322 bismaran viraştebî zî esta. Nê bismarî ê sivîl û leşkeranê ke ablûqayan de cuya xo vîndî kerdebî û ê multecîyanê ke a serre awan de xeneqîyabî temsîl kenê. Mîyanê xebatan de xebata Bengu Karaduman a bi nameyê “Sarı Ağıt”î (Şuwara Zerde) zî esta ke qalê yew maya ke domanê xo kerdo vîndî kena. Kîşta nê xebatan de pêramotiş de portreyê nûştoxe Asli Erdogane û ziwanzane Necmîye Alpaya ke seba nobeta rojnameyê Ozgurlukçu Demokrasî girewtîbî zî estê. Xebata ke bi nameyê portreyan amîya viraştene viraştoxa ci Berrîn Sîmavlioglu ya.      

Pêramotiş de yewna xebata ke bale ancena xo ser sey madeyêkê pêşnîyarî seba Beyannameyê Heqanê Merdiman cayê xo gêna: Edaleto Ekolojîk. Na xebata ke hetê Lamîa Karaalîye ra amîya viraştene de vajîyeno ke hewna termê „edaleto ekolojîk“ nêameyo pênasekerdene. Karaalîye derheqê xebate de nê vatî : “Serê rîyê erdî de heme ganeyî yewbînan rê pabeste yê. Ganî çimeyê xozayîyî bi hawayêk ke zirar nêdê ma û xozaya ma bêrê parekerden, şuzulnayene.”

Pêramotişo ke îdarekarîya ci Zeynep Ozatalaye kena tede nê hunermendî ca gênê: Arzu Yayintaşe, Asli Alpare, Başak Bugaye, Bengu Karadumane, Berrîn Sîmavlioglu, Candaş Şîşmane, Cansu Gursû, Çagri Saraye, Ethem Onur Bîlgîç, Fatoş Îrwene, Gumuş Ozdeşe, Hakan Gursoytrak, Halîl Yavuz Erturk, Kemal Gokhan Gurses, Lamîa Karaalî, Memet Gurelî, Murat Başol, Nalan Yirtmaçe, Nermîn Ere, Nerîman Polate, Nazim Dîkbaş, Sevîl Tunaboylu, Oguz Demîr, Tan Cemal Genç, Zehra Dogane û ZULAL.