Vizêr roja hîrêyîne ya Festîvala Kultur û Xoza ya Munzurî de Meydanê Seyîd Rizayî de konserî ameyî dayene. 

Konseran ra ver qezaya Pulirî de vera projeyanê madenî dewa Merxoyî de forumê ekolojî ame kerdene. Forum de ame parekerdene ke seba ke vera talan û hêrişanê serê xoza bêro girewtene ganî têkoşînêko ekolojîk o hempar bêro kerdene.

Konseran de Koroyê Domanan ê Behzat Fîrîkî, Alî Aslan, Zeynepe Kiliç, Şenol Akdag, Şevîne Hasdemîr, Taylan Yildiz, Dogan Çelîk û Grup Vardîya vejîyayî sehne ser. Şarê Dêrsimî û beşdaranê festîvale eleqeyêko pîl mojna konseran.

Hunermende Şevîne Hasdemîr konser de qedexeyê keyfî yê vera Grup Yorum û komanê bînan şermezar kerdî û vat: ''Na dişmenîye çita ya? War verdê wa nê merdimî hunerê xo bikerê.'' Dima Şevîne Hasdemîr deyîra ''İşkencede Günkerce'' (Bi Rojan Îşkence de) vate û girseyî pê nîşaneya serfîrazîye hunermende reyde deyîre vate.

Konserî pê çoşêkê pîlî qedîyayî.