Sekreteryaya Torra Ziwan û Kulturî ra Bawer Berşevî pare kerd ke ê do 21ê Sibata Roja Ziwanê Dayîke ya Dinya de medyaya dîjîtale ser o  Kampanyaya 'Perwerdeyê Bi Kurdkî' do bidê destpêkerdene. Berşevî da zanayene ke çarçewa kampanya de kampanyaya îmzayan a online do dest pêbikera û pêro rêxistin û komê ziwanî yê kurdan tewrê kampanya bibê.

Berşevî îfade kerd ke ê wazenê xo biresnê bi mîlyonan kesan û vat: ''Ma do îmzayan dima berê Meclîs û vajê hende merdimî perwerdeyê bi ziwanê dayîke wazenê. Ma 10 rojan ra nata amadekarîya na kampanya kenê. Hema zî pêvînayîşê ma dewam kenê.Na kampanya zaf girîng a. Heta ke ma meseleya ziwanê dayîke safî nêkerê meseleyê bînî zî safî nêbenê. Ma 21ê Sibate Roja Ziwanê Dayîke de kampanya îlan bikerê û kampanya heta 15ê Gulane Roşanê Ziwanê Kurdkî dewam bikero. ''

Berşevî ard ziwan ke ganî hedefo tewr verên ê kurdan perwerdeyê bi ziwanê dayîke bibo û venga pêro kurdan da ke paştî bidê kampanya.