Schaber: Îqtîdarî Ocalanî ra tersenê, no çîyêko hol o

Nuştoxo alman Peter Schaberî ke semedê înanê ke newe fîkranê Rayberê Şarê Kurdî Abdullah Ocalanî musenî kitabêk nuşt vat: '' Îqtîdarî Ocalanî ra tersenê. Goreyê mi no çîyêko hol o.''

Kitabê rojnameger-nuştox Peter Schaberî yê Fehmkerdişê Modernîteya Kapîtalîte: Dekewtişê felsefeya sîyasetê Abdullah Ocalanî rojanê ravêrteyan de vejîya.  Kitabo ke Weşanxaneyê Unrastî ra  (Unrast-Verlag) vejîya kitabo verên o ke almankî fikranê Ocalanî geno dest.

Peter Schaberî ke derheqê kitabê xo de ANFyî rê qisey kerd vat: Êyê ke wazenê fîkranê Ocalanî bimusî eşkenê pê nê kitabî dest pê bikerî.

Schaberî ard ziwan ke badê şerê Kobanê Almanya de merdimî têgêrayîşê kurdî meraq kenê û derheqê kitabî de nê vatî: ''Pîya bi Almanya de xeylêk  dormeyê mîyanneteweyî wazenê ke têgêrayîşê kurdî nas bikerê. Çi heyf  ke kitabê îdeolojîyê nê têgêrayîşî zaf qalin ê. Mi zî semedê înanê ke wazenê têgêrayîşê kurdan nas bikerê sey destpêkerdişî kitabêk nuşt. Tay qebul kenê-nêkenê zaf zî muhîm nîyo la Ocalan roja ma de nameyanê tewr bitesîran ê fkîryayîşê çepî yo ke felsefeyê ci rehet yeno fehmkerdene. Eke felsefeyêka polîtîke wazena bireso şelîgê pîlî ganî zelal bo û bêro fehmkerdene. Ocalan zaf zelal formule keno.''

Schaberî vat: ''Ocalan seba ke vera modernîteya kapîtalîste yo hema zîndan de binê tecrîdî de yeno tepiştene. Dewletanê emperyalîstan waşt ê mabênê çar dêsan de ey bêveng bikerî la hesabê înan xelet bi. Înan vatêne qey eke Ocalan zîndan de bo, têgêrayîşê ci nêeşkeno xo bido ciwîyayene û têkoşîn qedîyeno. La ewro badê 20 serran ma vînenê ke Ocalanî pê dêsan de fîkrê xo zaf rind newe kerdî û têgêrayîşê ci zî hîna bitesîr o.''

Schaberî vist vîrî ke par bi qerarê Wezîrîya Karanê Zereyî yê Almanî Weşanxaneyê Mezopotamya ame qefilnayene,  kitabê Ocalanî zî tede bi hezaran kitabî ameyî destsernayene û vat: ''Dewleta almanî hetêkî ra kibanê Ocalanî vejena, weşanxaneyî kena qedexe û krîmînalîze kena, hetê bînî ra çalakîyan de fotografanê ci qedexe kena. Nê pêro ramojnenê ke îqtîdarî Ocalanî ra tersenê. Goreyê mi no çîyêko hol o.''

Schaberî bale ante ser ke alozîyaya Rojhilatê Mîyanênî pê fîkranê Ocalanî eşkena bêro qedînayene û wina dewam kerd: ''Vernîyazê Ocalanî fîkranê akemîsyenêkî ra zafêr ê. Çunku fikrê ey ameyî caardene. Na çerçewe de teorî û pratîk pîya rayra şinê. Xora yewbîyayîşê şaran û îtîqatanê cîya cîyayan û  pîya têkoşînkerdişê cinî û camêrdan ê Rojawanî de ame dîyene. No proje hem zî binê hêrişê dewleta tirke û çeteyanê DAÎŞî de ser kewt.''

Schaberî qiseykerdişê xo wina qedîna: ''Têgêrayîşê kurdî çar welatanê muhîman ê herême Sûrîye, Iraq, Îran û Tirkîya de aktîf o. Hemeyê nê welatan de xeylêk problemê bînî estê. Eke nê welatî çareserî wazenê, ganî Ocalanî serbest veradê û sey muhatabî qebul bikerê. Azadîya ey do herême qoqî ra bibedilno. La Tirkîya hema naye rê amade nîya. Têna mela Tirkîya de şorişêk ey zîndanî ra vejo.''