Dîrektorî Ozkan Ulucan û Sevîme Kahraman seba viraştişê fîlmê xo yê dokumanterî yê 'Klamlarin Ardinda Dersim Sanatçilari' (Peyê Kilaman de Hunermendê Dêrsimî) ameyî têhet û amadekarîya xo kenê.

Fîlmê dokumenterî de dengbêjê Sey Qajî, Qemera Arayîzî, Sae Hayder û Silo Qizî û hunermendê nikayênî do ca bigêrê. Fîlmo dokumanter do 4 serrewextan de bêro girewtene û tede serebûtê sîyasal, kulturel, huner û komelkî yê Dêrsimî do bêrê vatene.

Îdarekar Ozkan Ulucanî da zanayene ke hunermendê kirdî yê ke Dêrsim, Îstanbul û Ewropa de yê do tewrê dokumanterî bibê.

 Ulucanî vist vîrî ke kirdkî (kirmanckî) ha seteret de ya û vat: ''Ziwanê na xebata ma do biba kirmanckî û tede estanikan ra heta xoza û kilaman her çi bêro yewca. Ma waşt ke ma pê veng û dimenan bimojnê çita ho destê ma ra şino beno vînî.''

Ulucanî bale ante ser ke dokumanter de hesreta seba welatî, şer, lorik û surgunî ca bigêrê û vat: ''Ma pê eseranê hunermendanê Dêrsimî surgun, koç, şer, vengkerdişê dewan, lorik û hesreta seba welatî vajê. Ma serrêke ra nata senaryoyê na xebate nusenê. Ma vat 'gelo seba ke ziwanê ma çin nêbo ma se bikerê' û ma wina kewtî rayîr. Ma waşt ke goş bidê kilaman ser. Muzîk do ma bikerê raywanê nê rayîrî.'' 

Ulucanî ard ziwan ke seba fîlmê dokumanterî ê hewceyê ekîpmanan ê û pabeyê hetkarîya komele, waqif, dezgeh û kesanê hîsgeran ê.