Bi wesîleya serrgêra yewîne ya ronîyayîşê Zarok MA 6ê temmuze de seba domanan konserêk do bêro serûberkerdene. Bilêtê konserî nika ra qedîyayî. Zarok MA binê sîwana Akademîya Ma Muzîkî de ya û perwerde dana domananê 0-5 serreyan.

Konserê Zarok MA merkezê xo de, taxa Dîclekentî ya qezaya Peyasî ya Amedî de do bêro kerdene. Konser de hunermendê Koma MA reyde hunermendê Başûr û Rojhelatê Kurdîstanî zî do vejîyê sehne ser.

Koordînatorê Akademîya Ma Muzîkî Şêrko Kanîwarî Ajansê Mezopotamya rê qisey kerd û da zanayene ke nika 600 wendekarê înan est ê, bi hawayêkê aktîfî perwerde danê 350 domanan.

Kanîwarîyî vat: ''Seba ke vera kurdkî û kulturê kurdan hêrişî est ê, berardişê kulturê kurdan zaf girîng o. Ma pê xebatanê xo kenê ke kulturê xo biciwîyê û pê deyîran pîl bikerê. Ganî domanê ma bi nê hawayî pîl bibê. Pêro dinya de têna ma perwerdeyê muzîkî danê domananê 0-5 serran.  Her roje konser, mîtîng, dewat û hunerê ma yenê qedexekerdene. Rixmê nînan zî 600 keyeyan muracatê ma kerd. Ma do wayîrê kultur û hunerê xo vejîyê. 

Ez venga pêro keyeyan dana ke wa beşdarê konserê 2-7ê temmuze bibê. Bilêtê konserê 6ê temmuze qedîyayî.''