Binê sîwana Akademîya Ma Muzîkî de qeydê seba Ma Muzîkî û Zarok Ma dest pêkerd û qeydî heta 15ê êlule do dewam bikerê. Seba perwerdeyê dengbêjîye û şanî zî qeydî do heta teşrîna verêne dewam bikerê. 

Koordînatorê Ma Muzîkî Şêrko Kanîwarî derheqê babete de Ajansê Mezopotamya rê qisey kerd û venga pêro kesan da ke wayîrê muzîkê kurdan vejîyê.

Şêrko Kanîwarî da zanayene ke Zarok Ma de pêro perwerdeyê înan bi kurdkî yê û domanî Zarok Ma de hem benê sosyal, hem muzîkî musenê hem zî dîsîplînê xebatanê kulturî gênê. Kanîwarî vat: ''Domanî sinifanê 12 kesan de kultur, ziwan, deyîr û hunermendanê kurdan şinasnenê. Zarok Ma keno ke mabênê kulturê kurdan û tradîsyonê kurdan de seba neslanê verê ma pirdêkî awan bikera. Bi perwerdeyanê Zarok Ma  verê asîmîlasyonî zî gêrîyeno. Heta 15ê êlule keyeyî eşkenê qeydê domananê xo virazê. Heta nika 390 keyeyan muracatê qeydî kerd. Kontenjanê ma 800 o. Reyna ma perwerde danê dergûşanê 4-60 mengan. Perwerdeyê Zarok Ma 1ê teşrîna verêne de do dest pêbikerê.''

Kanîwarî pare kerd ke seba ciwananê 15-30 serran zî heta teşrîna verêne qeydî do dewam bikerê û vat: ''Seba ciwanan Akademîya Ma Muzîkî de panc rojanê hewteyî dersî est ê.  Tîya de zî pêro perwerdeyê ma kurdkî yê. Akademîya ma de perwerdeyê pêro enstrumanan est ê.  Akademîya Dengbêjîye û Şanî de zî ma perwerdeyê formel û perîyodîkî danê. Kesê 10-30 serreyî eşkenê heta teşrîna verêne muracatê na akademî bikerê.''

Kanîwarî  peynîya qiseykerdişê xo de venga keyeyan û pêro kesan da ke seba dewrê neweyî qeydê xo virazê û vat: ''Ma eşkenê pîya polîtîkayanê asîmîlasyonî yê vera muzîkê kurdan pûç bikerê.''