Merkezê Kulturê Dîcle Firatî de qeydê dewrê neweyî dest pêkerd. Îdarekara Merkezê Kulturî Kîbare Suvarî wina vat: "Semedê wayîrvejîyayîşê kulturî ganî pêro cinî, tûtî û ciwanî tewrê kursan bibê."
Merkezê Kulturê Dîcle Firatî wextê vîrusê korona (Covîd-19) de xebatanê kultur û hunerî bi onlîne dewam kerd. La prosesê normalîzebîyayîşî ra dima merkezî qerarê perwerdeyê rî bi rîyî da. Merkez de dersê resim, saz, gîtar û xeylêk û ê beşanê bînan yenê dayene. Semedê kurdan qeydî dest pêkerd û heta 22ê teşrîna verêne qeyd do dewam bikero.
Îdarekara Merkezê Kulturê Dîcle Firatî Kîbar Suvarî ard ziwan ke înan vernîya pandemî û dimayê ci demêk dersê onlîne kerdê û wina dewam kerd: "Vernîya pandemî kursê ma estbîyî. Jan de ma onlîne dewam kerd. Demê normalbîyayîşî de ma wextêk zî onlîne kerd.''
Kîbare wina qal kerd: "Nika bi normalbîyayîşî ma do rî bi rî perwerde bidê. Semedê ney qeydê ma destpêkerd. Kursê saz, gîtar, keman, santur, resim, erbane, perkusyon û folklor do dest pêbikerê. Nê prosesî de semedê cinî, tutî û pîlan perwerde bêro dayene. 2003 ra heta nika merkezê ma de xeylêk wareyan de kurs û atolye yenê dayene. Merkezê ma de xeylêk wareyan de perwrede ame dayene. Çarçewa festîvalan de atolyeyî ameyî viraştene. Xeylêk kesî bîyî hunermend. Nika ê hunermendî wareyê hunerî de perwerde danê. Ma zî xebatan kenê."
Kîbare tewr peyîn wina vat: "No cayêko tarîxî yo, ma tîya mîyanê ercê kulturî de perwerde danê. Eynî wextî de ma kulturê xo danê ciwîyayene. Ma veng danê pêro cinî, tutî û ciwanan ke tewrê kursan bibê."
