Vera xespêkerdişê Şaredarîya Sêrtî çalakîyî dewam kenê. Şaro ke taxa Bahçelievlerî de ame têhet bi slogananê “Bijî berxwedan Tişrînê”, “Bijî berxwedana Rojava”, “Bijî berxwedana gelê Kurd”, “Ma do bi xoverdayîşî ser bikewê ” û “Jin, jiyan, azadî” ver bi şaredarî reyra şi.

Verê şaredarî de pîya bi çalakwananê nobete eşkerayîye ameye dayene. Hemserekê DEM Partî yê Sêrtî Mustafa Dayanan ard ziwan ke îqtîdaro ke îradeyê şarî çîn hesibneno çînbîyayîşî rê rî bi rî yo.

Wekîlê DEM Partî yê Mêrdînî Kamuran Tanhan zî vat: ''Na ablûqa mojnena ra ke şima senî îradeyê şarî ra tersenê. Nê dîmenê îşxalî yê. Seba ke hetkaranê xo zengîn bikerî wîna bêehleqîye, dizdîye kenê. La ma şarî do destûr medê înan.''

Wekîla DEM Partî ya Şirnexî Newroze Uysal Aslan zî nê vatî: ''Şarê kurdî vera polîtîkayanê qirkerdişî yê îqtîdarî xover da, xover dano. Dêrsim, Zîlan û Agirî îspatê nê yê. Tîya Newela Qeseba est a. Newela Qeseba pîya bi qirkerdişî sîmgeyê xoverdayîşî ya. Birêz Ocalan 1999î ra nata vera tecrîdê giranî xover dano. Îmraliyî ra heta Tirşînî, kuçeyanê Sêrtî xoverdayîş dewam keno. Azadîye do Îmrali de destpê bikero û kuçeyanê Sêrtî ra vila bo. Şarê kurdî haştîya bianore wazeno. Şarê kurdî  heme destkewteyê xo bi xoverdayîşî fînayî dest, bi xoverdayîşî ame masaya haştîye.''