Taxa Şerefya ya qezaya Rêya Armûşî ya Wanî de veng û awazê Balabanê (mey) Sîyabend Guler (10) û birayê ci Semend Guler (8) firîyenê. Taxe de bi desan hemwelatîyî dormeyê qird domanan de yenê pêser û nînan goşdarî kenê. Sîyabend û Semed serê rêçê Mîrê Bilûrî Egîdê Cimoyî de şinê.

Sîyabendî wexto ke 8 serre bi dest pê cinitişê Balabanî kerdo û nika berhemanê Egîdê Cimoyî cineno. Pêro ferdê keyeyê Gulerî zî eşkenê enstruman bicinê û muzîkî reyde eleqedar ê. Sîyabend şaristan bi şaristan gêreno û kuçeyanê Kurdîstanî de hunerê xo pêşkêş keno.

Guler muzîkê deyîran pê formê notayan cineno û wazeno bibo perwerdekarê muzîkî. Xeyalê ey o tewr pîl no yo ke sey Egîdê Cimoyî bibo hunermendêko serkewte. 

Sîyabend Gulerî ard ziwan ke Bilûr û Balaban kulturê kahanî yê û vat: ''Bilûr erjê kurdan mîyanê xo de nimneno. Wexto ke ez Bilûr û Balaban cinena bena aram. Ez babîyê xo ra nê hunerî musaya. Babîyê mi bilûrwan o û kekê mi zî bilûr cineno. Ez kilamanê Radyoya Erîvanê cinena. Seba ke no qîmet vînî nêbo ez şaristan bi şaristan gêrena û hunerê xo kena. Ganî komelê ma wayîrê nê hunerî vejîyê.''