Merkezê Cimatê Demokratîkî yê Kurdistanîyan ê Winterthurî festîvalêk viraşte û festîvale de qalê muhîmîya perwerdeyê bi ziwanê maye ame kerdene. Festîvale de aktîvîteyê kultur û hunerê Kurdan zî ameyî viraştene.

Qiseykerdoxêk ke bi nameyê komîteya amadekare ya festîvale qisey kerd, ard ziwan ke ê bi kursanê xo yê ke menga Adare ra dest pêkerdê wazenê cewab bide hêrişanê serê ziwanê înan ê maye û nika derse danê nizdê 30 wendekaran.

Qiseykerdoxe vat, “Beno ke mîyanê hewteyî de bi dayîşê çend saetî dersan ma nêeşkê cewabêko mird bidê hêrişanê hemverê kultur û ziwanê xo, la qe nêbo ma wazenê ke seba domananê xo zemînêkê ziwan û kulturê xo biafernê. Na yewe ra karo ke ma kenê xeylî muhîm û lazim o.”