Tîyatroyê Şaristanî yê Amedî rixmê teda û qedexeyan zî kayanê xo yê bi kurdkî pêşkêş keno. Kaykerdoxanê Tîyatroyê Şaristanî yê Amedî ra Berfîne Emektar derheqê xebatanê înan û tîyatroyê kurdkî de Ajansê Mezopotamya rê qisey kerd. 

Berfîne da zanayene ke qeyûm keno ke waranê huner û kulturî de asîmîlasyonî cabikero û vat: ''Ma sey hunermendanê tîyatroyê kurdkî nê serranê peyênan de nêeşkenê salonêke bivînê. La ma kenê ke waranê alternatîfan awan bikerê û bi nê hawayî xo biresnê temaşekeran. Nika Amed de yew kulturê tîyatroyî est o. Tîyatroyê Şaristanî yê Amedî hêz dano tîyatroyê kurdkî. Tîyatroyê kurdan-kurdkî hînî teyna Amed de ney Êlih, Wan, Îstanbul û pêro Kurdîstan de xo rêxistin keno.''

Berfîne ard ziwan ke hewayê germî ra di mengî yo Amed de kay nêno mojnayene la ê bi kelecanî pabeyê sezonê neweyî yê. Berfîne vat: ''Bernameyê ma yê êlule kelecanê ma mojneno. Tîyatroyê kurdan seba ke ziwanê kurdkî aver şoro zaf girîng o. Ma vînenê ke şarê ma zî bi na hişmendî wayîrê tîyatroyê ma vejîyeno. Ma do sezonê neweyî de rixmê pêro qedexe û tedayan waranê alternatîfan awan bikerê û xo biresnê temaşekeranê xo.''

Berfîne Emektar venga pêro kesan da ke êlule de bêrê û kayanê Tîyatroyê Şaristanî yê Amedî seyr bikerê.