Roja peyêne ya Fuarê Kitaban ê Stenbolî de kitabê hetkarê serekê Grûba HDPyî yo verên Îdrîs Balukenî yê bi nameyê “Üç Kırık Dal” (Hîrê Gilîyê Şikteyî) o ke zîndan de nûştibi hetê parlamenterê HDPyî yo verên Sirri Sureyya Onderî ra ame îmzakerdene.
TUYAP de kitabê hetkarê serekê Grûba HDPyî yo verên Îdrîs Balukenî rê eleqedarîyêka pîle esta.
Aktîveteyê Fuarê Kitaban ê Stenbolî ke reya 37. hetê TUYAPî ra emser bi temaya “Edebîyatî dir dorpêştişê cuye” yeno viraştene roja xo ya peyêne de zî dewam kerdî. Çarçiwaya Fuarî de kîşta aktîvîteyanê goşdarîyê şîîran, qiseykerdişî, panelî û belgefîlman de xeylî aktîvîteyî ameyî viraştene.
Seba kitabê hetkarê serekê Grûba HDPyî yo verên Îdrîs Balukenî yê bi nameyê “Üç Kırık Dal”î (Hîrê Gilîyê Şikteyî) zî aktîvîteyêka îmzeyan amî organîzekerdene. Kitabê Balukenî hetê parlamenterê HDPyî yo verên û sînemakar Sirri Sureyya Onderî ra ame îmzakerdene.
Aktîvîteya ke dorê dergî virazîyayî de kitabperweran kîşta kitabê Hîrê Gilîyê Şikteyî de kitabê hemsereka Şaredarîya Bajarê Pîlî yê Amedî ke herinda ci de qeyûm amebi tayînkerdene Gultan Kişanake yê bi nameyê "Kürt Siyasetinin Mor Rengi" (Rengê Sîyasetê Kurdî yo Mor) û kitabê hemserekê HDPyî yo verên Selahattin Demîrtaşî yê bi nameyê "Seher" zî dayî ame îmzakerdene.
Tayê wendoxan bi vatişê “İdris Baluken îradeyê ma yo” û bi çepikan tewrê aktîvîteya îmza bîyî.
