Hetê Organîzasyonê Perwerde, Zanayîş û Kulturî yê Neteweyê Yewbîyayeyî (UNESCO) ra paytextê Azerbaycanî Baku de kombîyayîşê Komîteya Mîrasê Dinya yo 43’in ame viraştene. UNESCO’yî yo ke verê kombîyayîşî raporêk weşana, derheqê xebatanê pawitişî yê Sûranê Amedî û Wareyê Peyzajî yê Kulturkîyî yê Baxçeyanê Hewselî de ercnayîşî kerdî.

Rapor de ame vatene ke wextê qedexeyê tebervejîyayîşî yê serra 2015‘î de qezaya Sûrî de xeylî awanîyan zirarêko pîl dîyo û ca dîya vînayîşanê Merkezê Mîrasê Dinya. Rapor de ame vatene ke her çend Tirkîya derheqê xebatanê restorasyonê Sûrî û dormeyê ci de raporî pêşkêşê UNESCO’yî kerdê zî, hewna ke Mîsyonê Çimdarîye yê Reaktîfî xebatê cigêrayîşî nêkerdê înan dest bi xebatê restorasyonî kerdê û no çîyêko xemgînkerdox o. 

Ganî Tirkîya Tarîx Bido

Dewamê raporî de bale ancîyaye îhtîmal esto ke xebatê restorasyonê Sûrê Amedî û dormeyê ci zirar bidê “Ercê Înan ê Unîversalî yê Berzî” û ame waştene ke Mîsyonê Çimdarîye yê Reaktîfî cigêrayîşan bikero, heta ke netîceyê cigêrayîşan bêrê eşkerakerdene xebatê restorasyonî bêrê vindarnayene. Heman wextî de rapor de ardîya vîrî ke Halo Nêalelade herême de qedîyayo, seba ke Komîteya UNESCO’yî bieşko bêro şaristan de cigêrayîşan bikero Tirkîya tavilî tarîxêk bido înan.

Sûrî 2015 de Kewtîbî Lîsteya UNESCO’yî

Kombîyayîşê Dewrê 39’inî yê Komîteya Mirasê Dinya yo ke şaristanê Bonnî yê Almanya de 2015 de amebi viraştene, ê de qerar amebi girewtene ke Sûrê Amedî û Wareyê Peyzajî yê Kulturkîyî yê Baxçeyanê Hewselî Lîsteya Mîrasê Dinya ya UNESCO’yî de bêrê qeydkerdene.