Kurdîstan û Tirkîya de serra perwerde û musnayîşî dest pêkerd. Sey her serre emser zî bi mîlyonan domanê kurdî perwerdeyê bi ziwanê dayîke ra bêpar yenê verdayene.

Hemserekê Şubeyê Wanî yê Egitim-Senî Murat Atabayî derheqê perwerdeyê bi kurdkî de ANFyî rê qisey kerd. 

Atabayî îfade kerd ke ê bi serran o vanê ke çira domanî perwerdeyê bi ziwanê dayîke ra bêpar manenê. Atabayî vat: ''Domanî wexto ke bi ziwanê xo perwerde nêvînenê nêeşkenê xo rehet hîs bikerê û îfade bikerê. Domanî bi nê hawayî raştê meseleya pedagojîke yenê. Kurdî Tirkîya de wayîrê nufusêkê zêdeyî yê. Coka girîng o ke bi kurdî perwerde bêro dayene.''

Atabayî dîyar kerd ke serranê peyênan de otoasîmîlasyonêko cidî est o û vat: ''Keyeyî hînî bi kêmî domananê xo de bi kurdkî qisey kenê. Ganî ma asîmîlasyonê dewlete reyde otoasîmîlasyonî zî rexne bikerê. Çira ma wayîrê ziwanê xo nêvejîyenê? Ganî ma rexneyanê xo bidê.  Domanê ma dibistanan de çira bi kurdkî perwerde nêvînenê? Vera kurdkî asîmîlasyonêko cidî est o. Kurdan serranê 1920an de keye û kuçeyan de se ra 90 bi kurdkî qisey kerdêne la ewro kurdî se ra 7 keye û kuçeyan de bi kurdkî qisey kenê. Îqtîdarê AKPyî de asîmîlasyon vurîya otoasîmîlasyonî.''

Atabayî ard ziwan ke ganî girîngîya ziwanê dayîke şarî rê hol bêra vatene û vat: ''Dezgehê ke derheqê ney de têkoşîn kenê ganî kurdan ra vejîyê waran û qala ziwanê ma bikerê.''