'Wa hunermend, nuştox û roşnvîrî teberê prosesî de nêvinderê'

Komîteya TEV-ÇANDî ya PKKyî: Şorişgêr, hunermend, edebîyatkar, nuştox û roşnvîrî seke vizêr vera rejîmanê qirkeran vindertî ewro zî vera faşîzmê AKP-MHPyî û hemkarîya PDKyî dormeyê menfaatanê neteweyîyan de kom bibê.

Komîteya TEV-ÇANDî ya PKKyî pê eşkerayîyêka nuştekîye venga şorişgêr, hunermend, edebîyatkar, nuştox û roşnvîran da.

Eşkerayîye wina ya:

''Şero 3. yê Dinya erdê Kurdîstanî ser o yeno kerdene. 20 serran ra nata erdê Iraqî û 8 serran ra nata zî erdê Sûrîye dejê şer û rijnayîşî ancenê. Vergê netewedewlete vera heqanê neteweyan çimanê xo gênê û xo reyde na cograya zî hê kenê çin.

Şerê 3. yê Dinya bi komployê vera Rayberê ma dest pêkerd. Nê komployî ra dima mudaxeleyê vera cografyaya ma dest pêkerd. Tecrîdê vera Rayberê ma û nê mudaxeleyî pabesteyê yewbînan ê. Faşîzmê AKP-MHPyî zî gardîyanîya nê sîstemê tecrîdî keno. Tecrîdê Îmraliyî vera bi giranêr û vurîya sîstemê îşkenceyî. Nê kerdişan ra MHME û CPT mesuldar ê. Hînî wextê ci ameyo ke ma nê sîstemê îşkenceyî rê vajê 'bes o.'

Cografyaya Kurdîstanî vurîyaye meydanê şerî. Efrîn, Serêkanîyê û Girê Sipî binê îşxalê dewleta tirke de yê. Vera Başûrê Kurdîstanî zî xîretê îşxalî estê. PDK û dewleta tirke armanc kenê ke têkoşînê azadîye yê kurdan çin bikerê û coka PDKyî hêzê xo sewqê Zînî Wertê kerdî, hêrişê Heftanînî kerdî.

Sewqîyatê hêzanê PDKyî yê ver bi herêmanê gerîla çarçewa planê dewleta tirke yo û armancê ci zî gef û hêrişê vera Têgêrayîşê Azadîye yo.Keyeyê Barzanî û PDK kişta dewleta tirke de vera ma şuxilîyenê. Hol zanîyeno ke PDK MÎTî reyde têkilîyan keno û  şehdaetê kadroyê ma yê rayberî û gerîlayan de barê înan esto. Dewleta tirke Başûr de baregehan virazena, Başûr îşxal kena, merdimanê sivîlan qetil kena. Keyeyê Barzanî vera nê kerdişan bêveng o. PDK û keyeyê Barzanîverî zî hêrişê gerîlayanê PKKyî kerd û dewleta tirke reyde bi desan nêweş û kokimî nêweşxaneyan de qetil kerdî. No keye û hêz têna vera kurdan şer keno.

Planê hêrişê ke serkêşîya DYA û Îsraîlî de pê hemkarîya PDK û dewleta tirke ameyî kerdene, armanc kenê ke Têgêrayîşê Azadîye tasfîye bikerê û nê hêrişî dewamê komployî yê. Îşxalê Efrîn, Serêkanîyê, Girê Sipî û hêrişê vera Şingal, Mexmûr, Herêmanê Pawitişî yê Medya safhayê komloyî yê.

Eke şerê zereyî biqewimo menfaatê ma yê neteweyî do tira zerar bivînê. Pawitişê menfaatanê kurdan sere de şorişgêr, demokrat, hunermend, kedkarê kulturî, şaîr, roşnvîr û nuştoxî wezîfeyê pêro kurdan o. Ma venga nê kesan danê ke dormeyê menfaatanê kurdan de bêrê pêser û vera dişmenîya PDKyî ya seba kurdan tewir bigêrê.

Heyf ke PDK, ENKS û tay kesê ke pê nasnameyê kulturelî xo name kenê vera hêrişanê dewleta tirke bêveng ê yan zî hemkarîya nê hêrişan kenê. Şorişgêr, hunermend, edebîyatkar, nuştox û roşnvîrî  seke vizêr vera rejîmanê qirkeran vindertî  ewro zî vera faşîzmê AKP-MHPyî û hemkarîya PDKyî dormeyê menfaatanê neteweyîyan de kom bibê. No wezîfe mesuldarîya înan a. Wa hunermend, nuştox û roşnvîrî teberê nê prosesî de nêvinderê.

Ma sey TEV-ÇANDî hetê Têgêrayîşê Azadîye û têkoşînê rûmetênî yê şarê xo de yê. Ma wayîrê Hemleya 'Wext Wextê Azadîye yo' ya KCKyî vejîyenê û anê ziwan ke azadîya Rayber Apoyî krîterê ma yo verên o.  Hêz yewî û rêxistinîye de yo. Ma pê yewîya xo do naye bikerê. Azadîya Rayberîye zî azadîya neteweya ma zî pê yewîye bena.

Ma venga pêşmergeyanê PDKyî danê ke wa nêbê hemkarê îşxalê dewleta tirke yê vera Başûrî, hêrişanê vera gerîlayanê PKKyî. Ma venga pêşmergeyan danê ke xîretanê yewîya neteweyîye yê Têgêrayîşê Azadîye rê cewabêkê musbetî bidê û kişta gerîlayan de vera kolonyalîstan xo ver bidê.''