Fuarê Kitaban ê Çukurovayo ke emser reya 12ine bi hemkarîya TUYAP Adana Fuarcilik A.Ş. û Yewîya Weşankaranê Tirkîya (TYB) yeno organîzekerdene Merkezê Fuar û Kongre yê Mîyanneteweyî de roja xo ya 2ine de dewam keno. 500 ra vêşêr nûştoxî tewrê Fuarî bîyî û panel, pêvatiş û ramotişê fîlman zî tede 70 ra vêşêrî aktîvîteyî yenê viraştene.

Seba ke rojê ewilênî yê fuarî bî tewrbîyayîş tayê kemî bi la wendoxê ke bi domananê xo tewrê fuarî bî dîmenê xasekî vetî meydan.      

'89 KITABÊ MA AMEYÎ QEDEXEKERDENE’

Kesê ke wazenê fuar de kitabanê Kurdkîyan biherînê şinê standanê Aram û Ava. Weşanxaneyê Aramî zî rixmê qedexe û zextan de zî eleqedarîyêka pîle wendoxan ra vîneno. Weşanxaneyo ke heta nika 89 kitabê ci ameyê qedexekerdene fuar de bi 6 kitabanê neweyan cayê xo girewt.

Edîtoranê Aramî ra Ulaş Guldîkenî vat: “Heta nika 89 kitabê ma ameyî qedexekerdene. Ma bi 6 kitabanê neweyan yê "Lênuska Leyla" yê Menaf Osmanî, "Nişancı" yê Metîn Alataşî, "Sıfıra Yükselmek" ê Zekî Bayhanî, "Toprağın Şarkısı" yê Rojbîn Perîşane, "Hakikat Rejimi" yê Ergîn Atabeyî û bi Kurdkîya "Seher"î yê Selahattîn Demîrtaşî cayê xo fuar de girewt.”    

‘MA ÎNAN DAWETÊ WENDIŞÎ KENÊ’

Guldîkenî vat seba ke Weşanxaneyê Dîpnotî tewrê fuarî nêbîyo înan Aramî rê paştî daya û naye ra înan standê xo de kitabê parlamenteranê HDPyî yê ke nê weşanxaneyî ra vejîyabî rê zî ca dayê. Guldîkenî vat 12ê Çile de do sîyasetkar û aktîvîstî kitabê hemsereka Şaredarîya Bajarê Pîlî yê Amedî Gultan Kişanake “Kürt Siyasetinin Mor Rengi” û kitabê parlamenteranê HDPyî yê bînan îmza bikerê.

Guldîkenî peynî de vat: “Ma wazenê derheqê kitabanê xo de wendoxan dir munaqeşe bikerê. Gama Çukurova yeno vatene Edene yeno vîr. La Mersîn, Hatay û Osmanîye zî estê. Ma veng danê şarê Çukurovayî ke kitabanê ma biwanê, ma dir munaqeşe bikerê û bêrê kitabanê ma yê neweyan bivînê.”